jashn-e-id

sabhī ne 'iid manā.ī mire gulistāñ meñ

kisī ne phuul piro.e kisī ne ḳhaar chune

ba-nām-e-izn-e-takallum ba-nām-e-jabr-e-sukūt

kisī ne hoñT chabā.e kisī ne giit bune

baḌe ġhazab kā gulistāñ meñ jashn-e-'īd huā

kahīñ to bijliyāñ kauñdīñ kahīñ chīnār jale

kahīñ kahīñ koī fānūs bhī nazar aayā

ba-taur-e-ḳhās magar qalb-e-dāġh-dār jale

'ajab thī 'īd-e-ḳhumistāñ 'ajab thā rañg-e-nashāt

kisī ne bāda-o-sāġhar kisī ne ashk piye

kisī ne atlas-o-kamḳhvāb kī qabā pahnī

kisī ne chāk-e-garebāñ kisī ne zaḳhm siye

hamāre zauq-e-nazāra ko 'iid ke din bhī

kahīñ pe sāya-e-zulmat kahīñ pe nuur milā

kisī ne dīda-o-dil ke kañval khile paa.e

kisī ko sāġhar-e-ehsās chaknā-chūr milā

ba-faiz-e-'īd bhī paidā huī na yak-rañgī

koī malūl koī ġham se be-niyāz rahā

baḌā ġhazab hai ḳhudavand-e-kausar-o-tasnīm

ki roz-e-'īd bhī tabqoñ kā imtiyāz rahā

sabhi ne 'id manai mere gulistan mein

kisi ne phul piroe kisi ne KHar chune

ba-nam-e-izn-e-takallum ba-nam-e-jabr-e-sukut

kisi ne honT chabae kisi ne git bune

baDe ghazab ka gulistan mein jashn-e-'id hua

kahin to bijliyan kaundin kahin chinar jale

kahin kahin koi fanus bhi nazar aaya

ba-taur-e-KHas magar qalb-e-dagh-dar jale

'ajab thi 'id-e-KHumistan 'ajab tha rang-e-nashat

kisi ne baada-o-saghar kisi ne ashk piye

kisi ne atlas-o-kamKHwab ki qaba pahni

kisi ne chaak-e-gareban kisi ne zaKHm siye

hamare zauq-e-nazara ko 'id ke din bhi

kahin pe saya-e-zulmat kahin pe nur mila

kisi ne dida-o-dil ke kanwal khile pae

kisi ko saghar-e-ehsas chakna-chur mila

ba-faiz-e-'id bhi paida hui na yak-rangi

koi malul koi gham se be-niyaz raha

baDa ghazab hai KHudawand-e-kausar-o-tasnim

ki roz-e-'id bhi tabqon ka imtiyaz raha