maqtal ki eid-e-qurban

kitne ādāb se maqtal ko sajāyā gayā hai

phir tirī bazm se zindoñ ko uThāyā gayā hai

sach kisī jhuuT kī taḳhlīq nahīñ kar saktā

jaane kyā hai jo salīqe se chhupāyā gayā hai

is se baḌh kar nahīñ ho saktī fanā kī tasvīr

aisī hikmat se khilaune ko banāyā gayā hai

eid-e-qurbāñ se muqaddas nahīñ koī taqrīb

is tarah bhūlā sabaq yaad dilāyā gayā hai

is tarah ḳhvāb se miltī nahīñ koī ta.abīr

jaise sahrā meñ samundar ko bulāyā gayā hai

jaane ye kis ne banā.ī hai qayāmat kī shabīh

sirf ilzām musavvir pe lagāyā gayā hai

aur puḳhta huī jannat kī bashārat 'ḳhurshīd'

jis tarah miTTī meñ miTTī ko milāyā gayā hai

kitne aadab se maqtal ko sajaya gaya hai

phir teri bazm se zindon ko uThaya gaya hai

sach kisi jhuT ki taKHliq nahin kar sakta

jaane kya hai jo saliqe se chhupaya gaya hai

is se baDh kar nahin ho sakti fana ki taswir

aisi hikmat se khilaune ko banaya gaya hai

eid-e-qurban se muqaddas nahin koi taqrib

is tarah bhula sabaq yaad dilaya gaya hai

is tarah KHwab se milti nahin koi tabir

jaise sahra mein samundar ko bulaya gaya hai

jaane ye kis ne banai hai qayamat ki shabih

sirf ilzam musawwir pe lagaya gaya hai

aur puKHta hui jannat ki bashaarat 'KHurshid'

jis tarah miTTi mein miTTi ko milaya gaya hai