eid us pari-wash ki

phūTī lab-e-nāzuk se vo ik shoḳh sī laalī

thoḌī sī shafaq āriz-e-tābāñ ne churā lī

phir baam kī jānib uThe abrū-e-hilālī

aur chāñd ne sharmā ke kahā eid-mubārak

chheḌā vo hasīñ shab ne tamannāoñ kā jaadū

lahrā ga.ī ḳhalvat-kada-e-nāz meñ ḳhushbū

haule se sañvarne lage ehsās ke gesū

dī kis ne dar-e-dil pe sadā eid-mubārak

jhalkā ruḳh-e-raushan pe hasīñ sub.h kā partav

gulnār hathelī pe hinā dene lagī lau

zulfoñ se chalī nik.hat-e-vārafta kī ik rau

paiġhām liye aa.ī sabā eid-mubārak

sakhiyoñ ne ḳhayāloñ ke hasīñ rañg ubhāre

jaage ka.ī ḳhvābīda se jazbāt ke dhāre

phūTe vo nigāhoñ se tabassum ke phuvāre

māhaul huā naġhma-navā eid-mubārak

sadqe tire ai rūh-e-adā paik-e-latāfat

ḳhush aa.e tire husn ko ye kaif kī saa.at

ye tohfa-e-ash.ār hai nazrān-e-ulfat

ai jān-e-hayā jān-e-vafā eid-mubārak

phuTi lab-e-nazuk se wo ek shoKH si lali

thoDi si shafaq aariz-e-taban ne chura li

phir baam ki jaanib uThe abru-e-hilali

aur chand ne sharma ke kaha eid-mubarak

chheDa wo hasin shab ne tamannaon ka jadu

lahra gai KHalwat-kada-e-naz mein KHushbu

haule se sanwarne lage ehsas ke gesu

di kis ne dar-e-dil pe sada eid-mubarak

jhalka ruKH-e-raushan pe hasin subh ka partaw

gulnar hatheli pe hina dene lagi lau

zulfon se chali nikhat-e-warafta ki ek rau

paigham liye aai saba eid-mubarak

sakhiyon ne KHayalon ke hasin rang ubhaare

jage kai KHwabida se jazbaat ke dhaare

phuTe wo nigahon se tabassum ke phuware

mahaul hua naghma-nawa eid-mubarak

sadqe tere ai ruh-e-ada paik-e-latafat

KHush aae tere husn ko ye kaif ki saat

ye tohfa-e-ashaar hai nazran-e-ulfat

ai jaan-e-haya jaan-e-wafa eid-mubarak