ek aanch ki kami

sūraj āsmān se girā

aur lemūñ ban gayā

chāñd āsmān se girā

aur kapās kā phuul ban gayā

maiñ tārīḳh ke mīnār se girā

aur vāqi.a kyuuñ na ban sakā

paanī dariyāoñ se niklā

aur jañgal ban gayā

lafz kitāb se niklā

aur aalim ban gayā

maiñ us kī niyyat ke añdhere se niklā

aur āzādī kyuuñ na ban sakā

havā bādbān se girī

aur mallāh kā giit ban ga.ī

bosa hoñToñ se girā

aur mohabbat kā parinda ban gayā

din uqaab kī choñch se girā

aur sūraj-mukhī kā baaġh kyuuñ na ban sakā

tiir kamān se niklā

aur bādshāh ban gayā

shahzāda mahal se niklā

aur jogī ban gayā

ḳhayāl apne madār se niklā

aur nazm kyuuñ na ban sakā

ḳhvāhish dil se girī

aur kaalā gulāb ban ga.ī

nukta dhyān se girā

aur suufī ban gayā

maiñ zamīn par girā

aur bārish kā qatra kyuuñ na ban sakā!

suraj aasman se gira

aur lemun ban gaya

chand aasman se gira

aur kapas ka phul ban gaya

main tariKH ke minar se gira

aur waqia kyun na ban saka

pani dariyaon se nikla

aur jangal ban gaya

lafz kitab se nikla

aur aalim ban gaya

main us ki niyyat ke andhere se nikla

aur aazadi kyun na ban saka

hawa baadban se giri

aur mallah ka git ban gai

bosa honTon se gira

aur mohabbat ka parinda ban gaya

din uqab ki chonch se gira

aur suraj-mukhi ka bagh kyun na ban saka

tir kaman se nikla

aur baadshah ban gaya

shahzada mahal se nikla

aur jogi ban gaya

KHayal apne madar se nikla

aur nazm kyun na ban saka

KHwahish dil se giri

aur kala gulab ban gai

nukta dhyan se gira

aur sufi ban gaya

main zamin par gira

aur barish ka qatra kyun na ban saka!