ek actress

vo laḌkī vo ma.asūm alhaḌ sī laḌkī

kisī aarzū kī tarah dil-nashīñ thī

shuā-e-sahar kī tarah thī achhūtī

bahāroñ sitāroñ kā ḳhvāb-e-hasīñ thī

bahāroñ sitāroñ kā vo ḳhvāb lekin

nirālī hī ta.abīr meñ Dhal rahā hai

vo ma.asūm dil jo charāġh-e-vafā thā

havas kī bharī bazm meñ jal rahā hai

vo jalte hue kuchh pashemān bhī hai

nikhar bhī rahī hai magar is jalan se

jamāl-e-haqīqat bhī sharmā rahā hai

banāvaT ke is khokhle bāñkpan se

nadāmat ke TuuTe hue āñsuoñ ne

tabassum ko ārāsta kar diyā hai

bilakte hue valvaloñ ke lahū ne

nigāhoñ meñ bhī rañg sā bhar diyā hai

vo āzād panchhī jo Duubā huā thā

nashīle sajīle ḳhayāloñ ke ras meñ

baḌe naaz se bech kar pañkh apne

chahaktā hai ab maslahat ke qafas meñ

jo doshīzgī nik.hat-e-rā.egāñ thī

baḌā kār-āmad dhuāñ ban rahī hai

mohabbat bhare dil kī saada sī dhaḌkan

baḌī ḳhūb-sūrat fuġhāñ ban rahī hai

kuñvārī umañgoñ kī muñh-band kaliyāñ

zar-o-sīm ke Dher meñ tul rahī haiñ

badan kī mahaktī huī chāñdnī meñ

khanaktī huī zulmateñ ghul rahī haiñ

ḳhizāñ ke sunahrī fareboñ meñ aa kar

hayā kā muqaddas chaman luT rahā hai

ye aurat nahīñ ek madfan se jis meñ

ik alhaḌ sī laḌkī kā dam ghuT rahā hai

vo alhaḌ sī laḌkī jo kuchh saal pahle

kisī aarzū kī tarah dil-nashīñ thī

shuā-e-sahar kī tarah thī achhūtī

bahāroñ sitāroñ kā ḳhvāb-e-hasīñ thī

wo laDki wo masum alhaD si laDki

kisi aarzu ki tarah dil-nashin thi

shua-e-sahar ki tarah thi achhuti

bahaaron sitaron ka KHwab-e-hasin thi

bahaaron sitaron ka wo KHwab lekin

nirali hi tabir mein Dhal raha hai

wo masum dil jo charagh-e-wafa tha

hawas ki bhari bazm mein jal raha hai

wo jalte hue kuchh pasheman bhi hai

nikhar bhi rahi hai magar is jalan se

jamal-e-haqiqat bhi sharma raha hai

banawaT ke is khokhle bankpan se

nadamat ke TuTe hue aansuon ne

tabassum ko aarasta kar diya hai

bilakte hue walwalon ke lahu ne

nigahon mein bhi rang sa bhar diya hai

wo aazad panchhi jo Duba hua tha

nashile sajile KHayalon ke ras mein

baDe naz se bech kar pankh apne

chahakta hai ab maslahat ke qafas mein

jo doshizgi nikhat-e-raegan thi

baDa kar-amad dhuan ban rahi hai

mohabbat bhare dil ki sada si dhaDkan

baDi KHub-surat fughan ban rahi hai

kunwari umangon ki munh-band kaliyan

zar-o-sim ke Dher mein tul rahi hain

badan ki mahakti hui chandni mein

khanakti hui zulmaten ghul rahi hain

KHizan ke sunahri farebon mein aa kar

haya ka muqaddas chaman luT raha hai

ye aurat nahin ek madfan se jis mein

ek alhaD si laDki ka dam ghuT raha hai

wo alhaD si laDki jo kuchh sal pahle

kisi aarzu ki tarah dil-nashin thi

shua-e-sahar ki tarah thi achhuti

bahaaron sitaron ka KHwab-e-hasin thi