ek clerk laDki

jism hai terā rañg kī duniyā

ruup hai terā nuur kī vaadī

tū bhī majbūr hai clerkī par

ai clerkoñ ke dil kī shahzādī

terī āñkheñ surūr kā mandir

terī zulfeñ bahār kā maskan

aur Type kī gat pe nāchtā hai

terā doshīza naġhma.ī joban

tere un ārizoñ ke phūloñ par

gulistāñ kā gumān hotā hai

aur terā ġhurūr-e-zebā.ī

filoñ se lipaT ke rotā hai

apnī zau se jhijak rahā hai charāġh

tujh se Dartī hai terī parchhā.īñ

zindagī kī zarūrateñ tujh ko

kin ajab rāstoñ pe le aa.eñ

tū bhī vo she.r-e-dil-nashīñ hai jise

aaj tak koī qadr-dāñ na milā

ḳhud sarāpā bahār hai lekin

terā apnā chaman kabhī na khilā

aaj tak tū ne zaḳhm khaa.e haiñ

rañg-afshāñ guloñ ke dhoke meñ

aa sajā luuñ tire tajassus ko

apne ehsās ke jharoke meñ

aa.ina kis liye hai zañg-ālūd

phuul kī pañkhuḌī pe sil kyuuñ hai

dekh kar tujh ko sochtā huuñ maiñ

zindagī itnī tañg-dil kyuuñ hai

jism hai tera rang ki duniya

rup hai tera nur ki wadi

tu bhi majbur hai clerki par

ai clerkon ke dil ki shahzadi

teri aankhen surur ka mandir

teri zulfen bahaar ka maskan

aur Type ki gat pe nachta hai

tera doshiza naghmai joban

tere un aarizon ke phulon par

gulistan ka guman hota hai

aur tera ghurur-e-zebai

filon se lipaT ke rota hai

apni zau se jhijak raha hai charagh

tujh se Darti hai teri parchhain

zindagi ki zaruraten tujh ko

kin ajab raston pe le aaen

tu bhi wo sher-e-dil-nashin hai jise

aaj tak koi qadr-dan na mila

KHud sarapa bahaar hai lekin

tera apna chaman kabhi na khila

aaj tak tu ne zaKHm khae hain

rang-afshan gulon ke dhoke mein

aa saja lun tere tajassus ko

apne ehsas ke jharoke mein

aaina kis liye hai zang-alud

phul ki pankhuDi pe sil kyun hai

dekh kar tujh ko sochta hun main

zindagi itni tang-dil kyun hai