ek d pi ki udasi

chaudhvīñ kī shab hai lekin mātamī malbūs meñ lipTī huī hai

chāñdnī bhī āñsuoñ meñ tar-ba-tar hai

āsmāñ hadd-e-nazar tak āsmāñ hai yā dhuāñ hai

har taraf ik ḳhāmushī mahv-e-fuġhāñ hai

gul se ḳhushbū bevafā.ī kar chukī hai

mānī-o-bahzād naqsh-o-rang saare kho chuke haiñ

barbat-o-nai se ḳhushī aur sarḳhushī rūThī huī hai

raqs kī maujeñ badan kī harkatoñ se aur adāoñ se ḳhafā haiñ

shā'irī se lafz-o-mā'nī kā ta'alluq zaḳhm-ḳhurda ho chukā hai

aaj kī shab kyā huā hai

kyoñ zamīn-o-āsmāñ meñ har taraf mātam bapā hai

whatsapp par tum ko dekhā

tab ye raaz ifshā huā hai

ek D-p kī udāsī kā.enātī ho ga.ī hai

chaudhwin ki shab hai lekin matami malbus mein lipTi hui hai

chandni bhi aansuon mein tar-ba-tar hai

aasman hadd-e-nazar tak aasman hai ya dhuan hai

har taraf ek KHamushi mahw-e-fughan hai

gul se KHushbu bewafai kar chuki hai

mani-o-bahzad naqsh-o-rang sare kho chuke hain

barbat-o-nai se KHushi aur sarKHushi ruThi hui hai

raqs ki maujen badan ki harkaton se aur adaon se KHafa hain

sha'iri se lafz-o-ma'ni ka ta'alluq zaKHm-KHurda ho chuka hai

aaj ki shab kya hua hai

kyon zamin-o-asman mein har taraf matam bapa hai

whatsapp par tum ko dekha

tab ye raaz ifsha hua hai

ek D-p ki udasi kaenati ho gai hai