ek dost ki KHush-mazaqi par

ho nahīñ saktā tirī is ''ḳhush-mazāqī'' kā javāb

shaam kā dilkash samāñ aur tere hāthoñ meñ kitāb

rakh bhī de ab is kitāb-e-ḳhushk ko bālā-e-tāq

uḌ rahā hai rañg-o-bū kī bazm meñ terā mazāq

chhup rahā hai parda-e-maġhrib meñ mahr-e-zar-fishāñ

diid ke qābil haiñ bādal meñ shafaq kī surḳhiyāñ

maujzan jū-e-shafaq hai is tarah zer-e-sahāb

jis tarah rañgīn shīshoñ meñ jhalaktī hai sharāb

ik nigārish-e-ātishīñ har shai pe hai chhāyā huā

jaise aariz par urūs-e-nau ke ho rañg-e-hayā

shāna-e-gītī pe lahrāne ko haiñ gesū-e-shab

āsmāñ meñ mun.aqid hone ko hai bazm-e-tarab

uḌ rahe haiñ justujū meñ āshiyānoñ ke tuyūr

aa chalā hai aa.ine meñ chāñd ke halkā sā nuur

dekh kar ye shaam ke nazzāra-hā-e-dil-nashīñ

kyā tire dil meñ zarā bhī gudgudī hotī nahīñ

kyā tirī nazroñ meñ ye rañgīniyāñ bhātī nahīñ

kyā havā-e-sard tere dil ko taḌpātī nahīñ

kyā nahīñ hotī tujhe mahsūs mujh ko sach batā

tez jhoñkoñ meñ havā ke gungunāne kī sadā

sabza-o-gul dekh kar tujh ko ḳhushī hotī nahīñ

uf tire ehsās meñ itnī bhī rañgīnī nahīñ

husn-e-fitrat kī latāfat kā jo tū qaa.el nahīñ

maiñ ye kahtā huuñ tujhe jiine kā haq hāsil nahīñ

ho nahin sakta teri is KHush-mazaqi ka jawab

sham ka dilkash saman aur tere hathon mein kitab

rakh bhi de ab is kitab-e-KHushk ko baala-e-taq

uD raha hai rang-o-bu ki bazm mein tera mazaq

chhup raha hai parda-e-maghrib mein mahr-e-zar-fishan

did ke qabil hain baadal mein shafaq ki surKHiyan

maujzan ju-e-shafaq hai is tarah zer-e-sahab

jis tarah rangin shishon mein jhalakti hai sharab

ek nigarish-e-atishin har shai pe hai chhaya hua

jaise aariz par urus-e-nau ke ho rang-e-haya

shana-e-giti pe lahrane ko hain gesu-e-shab

aasman mein munaqid hone ko hai bazm-e-tarab

uD rahe hain justuju mein aashiyanon ke tuyur

aa chala hai aaine mein chand ke halka sa nur

dekh kar ye sham ke nazzara-ha-e-dil-nashin

kya tere dil mein zara bhi gudgudi hoti nahin

kya teri nazron mein ye ranginiyan bhati nahin

kya hawa-e-sard tere dil ko taDpati nahin

kya nahin hoti tujhe mahsus mujh ko sach bata

tez jhonkon mein hawa ke gungunane ki sada

sabza-o-gul dekh kar tujh ko KHushi hoti nahin

uf tere ehsas mein itni bhi rangini nahin

husn-e-fitrat ki latafat ka jo tu qael nahin

main ye kahta hun tujhe jine ka haq hasil nahin