ek ehsas

ġhunūdgī sī rahī taarī umr bhar ham par

ye aarzū hī rahī thoḌī der so lete

ḳhalish milī hai mujhe aur kuchh nahīñ ab tak

tire ḳhayāl se ai kaash dard dho lete

mire azīzo mire dosto gavāh raho

birah kī raat kaTī āmad-e-sahar na huī

shikasta-pā hī sahī ham-safar rahā phir bhī

ummīd TuuTī ka.ī baar muntashir na huī

hayūlā kaise badaltā hai vaqt hairāñ huuñ

fareb aur na khaa.e nigāh Dartā huuñ

ye zindagī bhī koī zindagī hai pal pal meñ

hazār baar sambhaltā huuñ aur martā huuñ

vo log jin ko musāfir-navāz kahte the

kahāñ ga.e ki yahāñ ajnabī haiñ sāthī bhī

vo sāya-dār shajar jo sunā thā raah meñ haiñ

sab āñdhiyoñ ne girā Daale ab kahāñ jaa.eñ

ye bojh aur nahīñ uThtā kuchh sabīl karo

chalo hañseñge kahīñ baiTh kar zamāne par

ghunudgi si rahi tari umr bhar hum par

ye aarzu hi rahi thoDi der so lete

KHalish mili hai mujhe aur kuchh nahin ab tak

tere KHayal se ai kash dard dho lete

mere azizo mere dosto gawah raho

birah ki raat kaTi aamad-e-sahar na hui

shikasta-pa hi sahi ham-safar raha phir bhi

ummid TuTi kai bar muntashir na hui

hayula kaise badalta hai waqt hairan hun

fareb aur na khae nigah Darta hun

ye zindagi bhi koi zindagi hai pal pal mein

hazar bar sambhalta hun aur marta hun

wo log jin ko musafir-nawaz kahte the

kahan gae ki yahan ajnabi hain sathi bhi

wo saya-dar shajar jo suna tha rah mein hain

sab aandhiyon ne gira Dale ab kahan jaen

ye bojh aur nahin uThta kuchh sabil karo

chalo hansenge kahin baiTh kar zamane par