ek ghamgin yaad

mire pahlū-ba-pahlū jab vo chaltī thī gulistāñ meñ

farāz-e-āsmāñ par kahkashāñ hasrat se taktī thī

mohabbat jab chamak uThtī thī us kī chashm-e-ḳhandāñ meñ

ḳhamistān-e-falak se nuur kī sahbā chhalaktī thī

mire baazū pe jab vo zulf-e-shab-gūñ khol detī thī

zamāna nik.hat-e-ḳhuld-e-barīñ meñ Duub jaatā thā

mire shāne pe jab sar rakh ke ThanDī saañs letī thī

mirī duniyā meñ soz-o-sāz kā tūfān aatā thā

vo merā sher jab merī hī lai meñ gungunātī thī

manāzir jhūmte the bām-o-dar ko vajd aatā thā

mirī ā.ankhoñ meñ āñhkeñ Daal kar jab muskurātī thī

mire zulmat-kade kā zarra zarra jagmagātā thā

umañD aate the jab ashk-e-mohabbat us kī palkoñ tak

Tapaktī thī dar-o-dīvār se shoḳhī tabassum kī

jab us ke hoñT aa jaate the az ḳhud mere hoñToñ tak

jhapak jaatī thiiñ āñhkeñ āsmāñ par maah o anjum kī

vo jab hañgām-e-ruḳhsat dekhtī thī mujh ko muḌ muḌ kar

to ḳhud fitrat ke dil meñ mahshar-e-jazbāt hotā thā

vo mahv-e-ḳhvāb jab hotī thī apne narm bistar par

to us ke sar pe maryam kā muqaddas haath hotā thā

ḳhabar kyā thī ki vo ik roz mujh ko bhuul jā.egī

aur us kī yaad mujh ko ḳhuun ke aañsū rulā.egī

mere pahlu-ba-pahlu jab wo chalti thi gulistan mein

faraaz-e-asman par kahkashan hasrat se takti thi

mohabbat jab chamak uThti thi us ki chashm-e-KHandan mein

KHamistan-e-falak se nur ki sahba chhalakti thi

mere bazu pe jab wo zulf-e-shab-gun khol deti thi

zamana nikhat-e-KHuld-e-barin mein Dub jata tha

mere shane pe jab sar rakh ke ThanDi sans leti thi

meri duniya mein soz-o-saz ka tufan aata tha

wo mera sher jab meri hi lai mein gungunati thi

manazir jhumte the baam-o-dar ko wajd aata tha

meri aaankhon mein aanhken Dal kar jab muskuraati thi

mere zulmat-kade ka zarra zarra jagmagata tha

umanD aate the jab ashk-e-mohabbat us ki palkon tak

Tapakti thi dar-o-diwar se shoKHi tabassum ki

jab us ke honT aa jate the az KHud mere honTon tak

jhapak jati thin aanhken aasman par mah o anjum ki

wo jab hangam-e-ruKHsat dekhti thi mujh ko muD muD kar

to KHud fitrat ke dil mein mahshar-e-jazbaat hota tha

wo mahw-e-KHwab jab hoti thi apne narm bistar par

to us ke sar pe maryam ka muqaddas hath hota tha

KHabar kya thi ki wo ek roz mujh ko bhul jaegi

aur us ki yaad mujh ko KHun ke aansu rulaegi