ek hi rasta

mire yaar

terā mirā ek hī rāsta hai

ki palkoñ se sahrā ba-sahrā chamakdār zarrāt chun kar

sharābor muTThī meñ mahfūz karte raheñ

aur sar-e-shām

phailā ke in ko hathelī pe dekheñ

ki aayā koī reza-e-zar bhī hāsil huā yā nahīñ

kitāb-e-muqaddar bhī naqsh-e-izāfa na utre

to batn-e-tafakkur ko ummīd ke nān-e-shīrīñ se bhar kar

shagufta shuāoñ meñ sar ko jhukā.e

usī apnī mansūb rah pe nikal jaa.eñ

palkoñ se zarrāt chunñe kī ḳhātir

ġhurūb-e-shafaq tak

mere yar

tera mera ek hi rasta hai

ki palkon se sahra ba-sahra chamakdar zarraat chun kar

sharabor muTThi mein mahfuz karte rahen

aur sar-e-sham

phaila ke in ko hatheli pe dekhen

ki aaya koi reza-e-zar bhi hasil hua ya nahin

kitab-e-muqaddar bhi naqsh-e-izafa na utre

to batn-e-tafakkur ko ummid ke nan-e-shirin se bhar kar

shagufta shuaon mein sar ko jhukae

usi apni mansub rah pe nikal jaen

palkon se zarraat chunne ki KHatir

ghurub-e-shafaq tak