ek husn-farosh se

mohabbat aah terī ye mohabbat raat bhar kī hai

tirī rañgīn ḳhalvat kī latāfat raat bhar kī hai

tire shādāb hoñToñ kī ināyat raat bhar kī hai

tire mastāna bosoñ kī halāvat raat bhar kī hai

mah-e-raushan hai tū aur terī tal.at raat bhar kī hai

gul-e-shabbū hai tū aur terī nik.hat raat bhar kī hai

tū kyā jaane ki saudā-e-mohabbat kis ko kahte haiñ

mohabbat aur mohabbat kī latāfat kis ko kahte haiñ

ġham-e-hijrāñ hai kyā aur soz-e-ulfat kis ko kahte haiñ

junūñ hotā hai kaisā aur vahshat kis ko kahte haiñ

tū kyā jaane ġham-e-shab-hā-e-furqat kis ko kahte haiñ

tire iz.hār-e-ulfat kī fasāhat raat bhar kī hai

nigāh-e-mast se dil ko mire taḌpā rahī hai tū

ada-e-shauq se jazbāt ko bhaḌkā rahī hai tū

mujhe bachche kī sūrat naaz se phuslā rahī hai tū

khilaune de ke bosoñ ke mujhe bahlā rahī hai tū

magar nādān hai tū aah dhokā khā rahī hai tū

tirā rū-e-daraḳhshāñ hai ba-zāhir māhtāb-āsā

tire hoñToñ kī shādābī hai rañgat meñ sharāb-āsā

tire ruḳhsār kī mahtābiyāñ haiñ āftāb-āsā

magar in kī haqīqat hai habāb-āsā sarāb-āsā

ki ġhāze kī sabāhat us pe chhā.ī hai naqāb-āsā

aur is ġhāze kī bhī jhūTī sabāhat raat bhar kī hai

ye maanā terī ḳhalvat kī fazā rūh-e-gulistāñ hai

tirī ḳhalvat kā har fānūs ik mahtāb-e-larzāñ hai

tirā abreshmī bistar nahīñ ik ḳhvāb-e-ḳhandāñ hai

tirā jism āfat-e-dil terā siina āfat-e-jāñ hai

tū ik zinda sitāra hai jo tanhā.ī meñ tābāñ hai

magar kahte haiñ tāroñ kī hukūmat raat bhar kī hai

latāfat se haiñ ḳhālī tere kumhlā.e hue bose

tarāvat se haiñ ḳhālī tere murjhā.e hue bose

nazākat se haiñ ḳhālī tere ghabrā.e hue bose

haqīqat se haiñ ḳhālī tere sharmā.e hue bose

mohabbat se haiñ ḳhālī tere ghabrā.e hue bose

aur in bosoñ kī ye jhūTī halāvat raat bhar kī hai

tire zahrīle bose mujh ko jis dam yaad ā.eñge

mire hoñToñ pe kaale naag ban kar thartharā.eñge

pashemānī ke jazbe mujh ko dīvāna banā.eñge

mire inkār ko nafrat ke ḳhanjar gudgudā.eñge

mire dil kī ragoñ meñ ġham ke sho.ale tair jā.eñge

maiñ samjhā! aah samjhā! ye masarrat raat bhar kī hai

mujhe dīvāna karne kī masarrat be-ḳhabar kab tak

rahegī mere dil meñ terī ulfat kārgar kab tak

mujhe mas.hūr rakkhegā ye ishq-e-be-samar kab tak

haqīqat kī sahar āḳhir na hogī parda-dar kab tak

mujhe maġhlūb kar ke ḳhush hai tū zālim magar kab tak

tirī ye fat.h merī ye hazīmat raat bhar kī hai

mohabbat aah teri ye mohabbat raat bhar ki hai

teri rangin KHalwat ki latafat raat bhar ki hai

tere shadab honTon ki inayat raat bhar ki hai

tere mastana boson ki halawat raat bhar ki hai

mah-e-raushan hai tu aur teri talat raat bhar ki hai

gul-e-shabbu hai tu aur teri nikhat raat bhar ki hai

tu kya jaane ki sauda-e-mohabbat kis ko kahte hain

mohabbat aur mohabbat ki latafat kis ko kahte hain

gham-e-hijran hai kya aur soz-e-ulfat kis ko kahte hain

junun hota hai kaisa aur wahshat kis ko kahte hain

tu kya jaane gham-e-shab-ha-e-furqat kis ko kahte hain

tere izhaar-e-ulfat ki fasahat raat bhar ki hai

nigah-e-mast se dil ko mere taDpa rahi hai tu

ada-e-shauq se jazbaat ko bhaDka rahi hai tu

mujhe bachche ki surat naz se phusla rahi hai tu

khilaune de ke boson ke mujhe bahla rahi hai tu

magar nadan hai tu aah dhoka kha rahi hai tu

tera ru-e-daraKHshan hai ba-zahir mahtab-asa

tere honTon ki shadabi hai rangat mein sharab-asa

tere ruKHsar ki mahtabiyan hain aaftab-asa

magar in ki haqiqat hai habab-asa sarab-asa

ki ghaze ki sabahat us pe chhai hai naqab-asa

aur is ghaze ki bhi jhuTi sabahat raat bhar ki hai

ye mana teri KHalwat ki faza ruh-e-gulistan hai

teri KHalwat ka har fanus ek mahtab-e-larzan hai

tera abreshmi bistar nahin ek KHwab-e-KHandan hai

tera jism aafat-e-dil tera sina aafat-e-jaan hai

tu ek zinda sitara hai jo tanhai mein taban hai

magar kahte hain taron ki hukumat raat bhar ki hai

latafat se hain KHali tere kumhlae hue bose

tarawat se hain KHali tere murjhae hue bose

nazakat se hain KHali tere ghabrae hue bose

haqiqat se hain KHali tere sharmae hue bose

mohabbat se hain KHali tere ghabrae hue bose

aur in boson ki ye jhuTi halawat raat bhar ki hai

tere zahrile bose mujh ko jis dam yaad aaenge

mere honTon pe kale nag ban kar thartharaenge

pashemani ke jazbe mujh ko diwana banaenge

mere inkar ko nafrat ke KHanjar gudgudaenge

mere dil ki ragon mein gham ke shoale tair jaenge

main samjha! aah samjha! ye masarrat raat bhar ki hai

mujhe diwana karne ki masarrat be-KHabar kab tak

rahegi mere dil mein teri ulfat kargar kab tak

mujhe mashur rakkhega ye ishq-e-be-samar kab tak

haqiqat ki sahar aaKHir na hogi parda-dar kab tak

mujhe maghlub kar ke KHush hai tu zalim magar kab tak

teri ye fath meri ye hazimat raat bhar ki hai