ek ek aarzu sadqe mein utari jae

jashn-e-nauroz bhī hai

jashn-e-bahārāñ bhī hai

shab-e-mahtāb bhī

jashn-e-mah-e-tābāñ bhī hai

sunte haiñ

aaj hī jashn-e-shah-e-ḳhūbāñ bhī hai

aa.iye ai dil-e-barbād

chaleñ ham bhī vahāñ

jashn kī raat hai

sauġhāt to baTtī hogī

apne hisse kī

chaleñ ham bhī uThā leñ sauġhāt

dard kī

āḳhirī siine se lagā leñ sauġhāt

aur phir yuuñ ho

ki jab shaam Dhale

os meñ bhiig ke

gul-mohr kī ḳhushbū phaile

yaad kī chāñdnī

be-ḳhvāb darīchoñ pe gire

phir usī jashn kī

ye raat mire kaam aa.e

dard kī āḳhirī sauġhāt

mare kaam aa.e

āḳhir shab

shab-e-āḳhir Thahre

zid pe aayā huā ye dil Thahre

toḌ duuñ shīsha

jo hastī kā bhī phir jaam aa.e

kaam aa.e

to ye sauġhāt mire kaam aa.e

jashn kī raat hai

yuuñ nazr gizārī jaa.e

ek ik aarzū sadqe meñ utārī jaa.e

jashn-e-nauroz bhi hai

jashn-e-bahaaran bhi hai

shab-e-mahtab bhi

jashn-e-mah-e-taban bhi hai

sunte hain

aaj hi jashn-e-shah-e-KHuban bhi hai

aaiye ai dil-e-barbaad

chalen hum bhi wahan

jashn ki raat hai

saughat to baTti hogi

apne hisse ki

chalen hum bhi uTha len saughat

dard ki

aaKHiri sine se laga len saughat

aur phir yun ho

ki jab sham Dhale

os mein bhig ke

gul-mohr ki KHushbu phaile

yaad ki chandni

be-KHwab darichon pe gire

phir usi jashn ki

ye raat mere kaam aae

dard ki aaKHiri saughat

mare kaam aae

aaKHir shab

shab-e-aKHir Thahre

zid pe aaya hua ye dil Thahre

toD dun shisha

jo hasti ka bhi phir jam aae

kaam aae

to ye saughat mere kaam aae

jashn ki raat hai

yun nazr gizari jae

ek ek aarzu sadqe mein utari jae