ek ishq ki nasli tariKH

maiñ us kī sāñseñ sūñghtā huā

dariyāoñ aur maidānoñ meñ dāḳhil huā thā

aur vo mujhe zarḳhez zamīn kī tarah milī thī

maiñ tārīk raat meñ janmā huā mahtāb thā

aur vo shiryānoñ se ḳhuun uchhāl dene vaalī tamāzat thī

maiñ ret kī kushāda-dāmanī thā

aur us kī pusht sarmā ke sūraj kī tarah thī

maiñ eḌ lagā.e hue ghoḌe kī nañgī piiTh par kūdne vaale kā beTā thā

aur us kī āñkhoñ meñ

jāToñ kī ḳhūñ-rez sadiyāñ chunautī detī thiiñ

vo gunāh kī tarah namkīn thī

aur vo zā.iqa thī jo chakkhe baġhair zabān par phir jaatā thā

aur maiñ us kī guddiī meñ daañt gaaḌ dene kī hasrat meñ thā

vo dhartī par phailā huā sarsoñ kā khet thī

aur us ke haath gandum kāTne vaalī maañ ne banā.e the

aur us kī naaf ke gird bharā-purā shikam thā

aur us kī ghunDī meñ aisī jaan thī

ki us kā baap maurya ahd meñ patthar chamkāne kā kārī-gar ma.alūm hotā thā

aur us ke jism meñ tave par surḳh kī huī roTī kī ḳhushbū thī

aur maiñ āñtoñ se ugī huī aarzū thā

aur maiñ talvāroñ kī mausīqī par paḌhā huā rajaz thā

aur maiñ tiir khaa.e hue ghoḌe se girī haar thā

aur vo ta.ane se dahkī huī vañgār thī

aur vo aisī jiit thī

jis kī yaad meñ

zamīn par koī laaTh gaaḌī jā saktī thī

main us ki sansen sunghta hua

dariyaon aur maidanon mein daKHil hua tha

aur wo mujhe zarKHez zamin ki tarah mili thi

main tarik raat mein janma hua mahtab tha

aur wo shiryanon se KHun uchhaal dene wali tamazat thi

main ret ki kushada-damani tha

aur us ki pusht sarma ke suraj ki tarah thi

main eD lagae hue ghoDe ki nangi piTh par kudne wale ka beTa tha

aur us ki aankhon mein

jaTon ki KHun-rez sadiyan chunauti deti thin

wo gunah ki tarah namkin thi

aur wo zaiqa thi jo chakkhe baghair zaban par phir jata tha

aur main us ki guddii mein dant gaD dene ki hasrat mein tha

wo dharti par phaila hua sarson ka khet thi

aur us ke hath gandum kaTne wali man ne banae the

aur us ki naf ke gird bhara-pura shikam tha

aur us ki ghunDi mein aisi jaan thi

ki us ka bap maurya ahd mein patthar chamkane ka kari-gar malum hota tha

aur us ke jism mein tawe par surKH ki hui roTi ki KHushbu thi

aur main aanton se ugi hui aarzu tha

aur main talwaron ki mausiqi par paDha hua rajaz tha

aur main tir khae hue ghoDe se giri haar tha

aur wo tane se dahki hui wangar thi

aur wo aisi jit thi

jis ki yaad mein

zamin par koi laTh gaDi ja sakti thi