ek kahani

raat kal fazāoñ meñ terī hī kahānī thī

ham bhī sunñe vaale the dil kī pāsbānī thī

āsmāñ se aamad thī gum-shuda ḳhayāloñ kī

jis qadar tasavvur thā itnī shādmānī thī

duur saarī duniyā se ik nagar basāyā thā

us kā ek raajā thā us kī ek raanī thī

zulf-o-ruḳh kī bāteñ thiiñ din thā aur rāteñ thiiñ

sub.h kitnī rañgīñ thī shaam kyā suhānī thī

yaad haiñ vo din ab tak jab hasīn rātoñ meñ

terī gungunāhaT par merī naġhma-ḳhvānī thī

tere ik tabassum par vaqt bhī Thahar jaatā

is meñ kab tarannum thā is meñ kab ravānī thī

āñsuoñ se jiitā thā gauhar-e-mohabbat ko

terī kāmrānī bhī kaisī kāmrānī thī

kitnī garm-joshī thī kitnī girya-o-zārī

kitnī sard-mehrī thī kitnī sargirānī thī

ye mirī ḳhudā.ī thī yā tirī ḳhudā jaane

merī lan-tarānī par terī be-zabānī thī

maiñ ne tujh ko kab samjhā maiñ ne tujh ko kab paayā

maiñ zamīñ kā banda tū ruuh āsmānī thī

raat kal fazaon mein teri hi kahani thi

hum bhi sunne wale the dil ki pasbani thi

aasman se aamad thi gum-shuda KHayalon ki

jis qadar tasawwur tha itni shadmani thi

dur sari duniya se ek nagar basaya tha

us ka ek raja tha us ki ek rani thi

zulf-o-ruKH ki baaten thin din tha aur raaten thin

subh kitni rangin thi sham kya suhani thi

yaad hain wo din ab tak jab hasin raaton mein

teri gungunahaT par meri naghma-KHwani thi

tere ek tabassum par waqt bhi Thahar jata

is mein kab tarannum tha is mein kab rawani thi

aansuon se jita tha gauhar-e-mohabbat ko

teri kaamrani bhi kaisi kaamrani thi

kitni garm-joshi thi kitni girya-o-zari

kitni sard-mehri thi kitni sargirani thi

ye meri KHudai thi ya teri KHuda jaane

meri lan-tarani par teri be-zabani thi

main ne tujh ko kab samjha main ne tujh ko kab paya

main zamin ka banda tu ruh aasmani thi