ek kamra-e-imtihan mein

be-nigāh āñkhoñ se dekhte haiñ parche ko

be-ḳhayāl hāthoñ se

an-bane se lafzoñ par uñgliyāñ ghumāte haiñ

yā savālnāme ko dekhte hī jaate haiñ

sochte nahīñ itnā jitnā sar khujāte haiñ

har taraf kanakhiyoñ se bach bachā ke takte haiñ

dūsroñ ke parchoñ ko rahnumā samajhte haiñ

shāyad is tarah koī rāsta hī mil jaa.e

be-nishāñ javāboñ kā kuchh pata hī mil jaa.e

mujh ko dekhte haiñ to

yuuñ javāb copy par hāshiye lagāte haiñ

dā.ere banāte haiñ

jaise un ko parche ke sab javāb aate haiñ

is tarah ke manzar maiñ

imtihān-gāhoñ meñ dekhtā hī rahtā thā

naql karne vāloñ ke

nit-na.e tarīqoñ se

aap lutf letā thā dostoñ se kahtā thā

kis taraf se jaane ye

aaj dil ke āñgan meñ ik ḳhayāl aayā hai

saikḌoñ savāloñ sā ik savāl laayā hai

vaqt kī adālat meñ

zindagī kī sūrat meñ

ye jo tere hāthoñ meñ ik savāl-nāma hai

kis ne ye banāyā hai

kis liye banāyā hai

kuchh samajh meñ aayā hai

zindagī ke parche ke

sab savāl lāzim haiñ sab savāl mushkil haiñ

be-nigāh āñkhoñ se dekhtā huuñ parche ko

be-ḳhayāl hāthoñ se

an-bane se lafzoñ par uñgliyāñ ghumātā huuñ

koī dekhtā hai to

dā.ere banātā huuñ

hāshiye lagātā huuñ

yā savāl-nāme ko dekhtā hī jaatā huuñ

be-nigah aankhon se dekhte hain parche ko

be-KHayal hathon se

an-bane se lafzon par ungliyan ghumate hain

ya sawalname ko dekhte hi jate hain

sochte nahin itna jitna sar khujate hain

har taraf kanakhiyon se bach bacha ke takte hain

dusron ke parchon ko rahnuma samajhte hain

shayad is tarah koi rasta hi mil jae

be-nishan jawabon ka kuchh pata hi mil jae

mujh ko dekhte hain to

yun jawab copy par hashiye lagate hain

daere banate hain

jaise un ko parche ke sab jawab aate hain

is tarah ke manzar main

imtihan-gahon mein dekhta hi rahta tha

naql karne walon ke

nit-nae tariqon se

aap lutf leta tha doston se kahta tha

kis taraf se jaane ye

aaj dil ke aangan mein ek KHayal aaya hai

saikDon sawalon sa ek sawal laya hai

waqt ki adalat mein

zindagi ki surat mein

ye jo tere hathon mein ek sawal-nama hai

kis ne ye banaya hai

kis liye banaya hai

kuchh samajh mein aaya hai

zindagi ke parche ke

sab sawal lazim hain sab sawal mushkil hain

be-nigah aankhon se dekhta hun parche ko

be-KHayal hathon se

an-bane se lafzon par ungliyan ghumata hun

koi dekhta hai to

daere banata hun

hashiye lagata hun

ya sawal-name ko dekhta hi jata hun