ek KHat

samundar ne ye ḳhālī sīpiyāñ

kaise ugal diiñ

aa ke sāhil par

maiñ pahle bhī kahā kartā thā

tujh ko yaad ho shāyad

ki terī ruuh ke gahre samundar meñ

merā dil ek siipī hai

magar maiñ ne kabhī terī mohabbat ko numā.ish meñ nahīñ rakkhā

maiñ un logoñ se chiḌtā thā

jo afsāne kahā karte haiñ yāroñ se mohabbat ke

magar vaise bhī duniyā meñ kisī kī kaun suntā hai

sunātā hai koī jab apnī bāteñ

sunñe vaalī apnī bāteñ yaad karte haiñ

magar ye kaisī rāteñ haiñ

ki aksar sote sote chauñk uThtā huuñ

mujhe to niiñd bhī ik qarz chashm-e-ambar hai

maiñ sotā jāgtā rahtā huuñ

ik aise musāfir kī tarah

jis ko kisī chhoTe se station pe

gaaḌī se utartā ho

tere hilte hue hāthoñ se

ye kaisī havā aa.ī

mirī jaañ tujh se ruḳhsat ho ke

maiñ kitnā akelā thā

aur duniyā so rahī thī

us dil kī tarah

jis ne abhī ronā na sīkhā ho

koī koñpal

kabhī zor-e-numū meñ

sañg-basta ḳhaak se laḌtī huī

bāhar nikaltī hai

ki jaise shoḳh bachche

haath aur dāman chhuḌā kar

ghar se bāhar bhaag jaa.eñ

aur guzargāhoñ pe so jaa.eñ

guzar-gāhoñ se bachchoñ ko uThā kar laao

aur gahvāra-e-jāñ meñ sulā do

vo jāgeñge to un ke ḳhvāb puure ho chuke hoñge

so āḳhir yuuñ huā

ummīd kī shāḳhoñ pe aise barg-o-bār aa.e

mirī jaañ

terā milnā tishnagī ke dasht meñ

vo āb-e-tāza thā

jo shabnam bhī hai dariyā bhī hai

aur ruuh meñ ġham ho to aañsū bhī

mujhe aañsū nahīñ milte nahīñ milte nahīñ milte

vo shab bhī kaisī shab thī

jis kā naqd-e-sub.h ab tak qarz hai

jo mujh se pūchhtā hai

ab mehnat ko kahāñ le jāoge

kis dil meñ rakhoge

maiñ chup thā

tū bhī chup thī

aur ḳhāmoshī ke lamhoñ ke

guzarte qāfile

sāñsoñ kī āvāz-e-jaras jā rahe the

ek manzil kī taraf

jo nisf jannat nisf dozaḳh thī

maiñ kitnā sañg-dil huuñ

jo terī jannat pe ḳhush hotā nahīñ

dozaḳh pe hañstā huuñ

samundar ne ye KHali sipiyan

kaise ugal din

aa ke sahil par

main pahle bhi kaha karta tha

tujh ko yaad ho shayad

ki teri ruh ke gahre samundar mein

mera dil ek sipi hai

magar main ne kabhi teri mohabbat ko numaish mein nahin rakkha

main un logon se chiDta tha

jo afsane kaha karte hain yaron se mohabbat ke

magar waise bhi duniya mein kisi ki kaun sunta hai

sunata hai koi jab apni baaten

sunne wali apni baaten yaad karte hain

magar ye kaisi raaten hain

ki aksar sote sote chaunk uThta hun

mujhe to nind bhi ek qarz chashm-e-ambar hai

main sota jagta rahta hun

ek aise musafir ki tarah

jis ko kisi chhoTe se station pe

gaDi se utarta ho

tere hilte hue hathon se

ye kaisi hawa aai

meri jaan tujh se ruKHsat ho ke

main kitna akela tha

aur duniya so rahi thi

us dil ki tarah

jis ne abhi rona na sikha ho

koi konpal

kabhi zor-e-numu mein

sang-basta KHak se laDti hui

bahar nikalti hai

ki jaise shoKH bachche

hath aur daman chhuDa kar

ghar se bahar bhag jaen

aur guzargahon pe so jaen

guzar-gahon se bachchon ko uTha kar lao

aur gahwara-e-jaan mein sula do

wo jagenge to un ke KHwab pure ho chuke honge

so aaKHir yun hua

ummid ki shaKHon pe aise barg-o-bar aae

meri jaan

tera milna tishnagi ke dasht mein

wo aab-e-taza tha

jo shabnam bhi hai dariya bhi hai

aur ruh mein gham ho to aansu bhi

mujhe aansu nahin milte nahin milte nahin milte

wo shab bhi kaisi shab thi

jis ka naqd-e-subh ab tak qarz hai

jo mujh se puchhta hai

ab mehnat ko kahan le jaoge

kis dil mein rakhoge

main chup tha

tu bhi chup thi

aur KHamoshi ke lamhon ke

guzarte qafile

sanson ki aawaz-e-jaras ja rahe the

ek manzil ki taraf

jo nisf jannat nisf dozaKH thi

main kitna sang-dil hun

jo teri jannat pe KHush hota nahin

dozaKH pe hansta hun