ek KHwab

purānī qabreñ adhūre chehre ugal rahī thiiñ

adhūre chehre purānī qabroñ kī sard-zā bhurbhurī udāsī jo apne uupar girā rahe the

to aariz o chashm o lab kī tashkīl ho rahī thī

vo ek kun jo hazār sadiyoñ se multavī thā ab us kī ta.amīl ho rahī thī

qubūr-e-ḳhasta se gaah ḳhezāñ o gaah uftāñ, hujūm-e-isyāñ

har ek rishte se, har ta.alluq se māvarā thā

ga.e dinoñ kī mohabbatoñ ko, raqābatoñ ko, sa.ūbatoñ ko bhulā chukā thā

hujūm apne azal ke maqsūm ke mutābiq

ḳhud apne anjām ke junūñ meñ kashāñ kashāñ raah kāTtā thā

zamāna apne jamāl ko tark kar chukā thā

jalāl us ke buzurg chehre kī har shikan meñ dubak gayā thā

buzurg chehrā, hameshgī kā qadīm chehra

azal se is din kā muntazir thā

ki kab ye amboh-e-ḳhāksārāñ

ḳhud apne a.amāl ke khanakte hue salāsil meñ ġharq aa.e

gunāh barte savāb paa.e

purani qabren adhure chehre ugal rahi thin

adhure chehre purani qabron ki sard-za bhurbhuri udasi jo apne upar gira rahe the

to aariz o chashm o lab ki tashkil ho rahi thi

wo ek kun jo hazar sadiyon se multawi tha ab us ki tamil ho rahi thi

qubur-e-KHasta se gah KHezan o gah uftan, hujum-e-isyan

har ek rishte se, har talluq se mawara tha

gae dinon ki mohabbaton ko, raqabaton ko, saubaton ko bhula chuka tha

hujum apne azal ke maqsum ke mutabiq

KHud apne anjam ke junun mein kashan kashan rah kaTta tha

zamana apne jamal ko tark kar chuka tha

jalal us ke buzurg chehre ki har shikan mein dubak gaya tha

buzurg chehra, hameshgi ka qadim chehra

azal se is din ka muntazir tha

ki kab ye amboh-e-KHaksaran

KHud apne aamal ke khanakte hue salasil mein gharq aae

gunah barte sawab pae