ek laDki ka git

jahāñ chiḌiyāñ ghanerī jhāḌiyoñ meñ chahchahātī hoñ

jahāñ shāḳhoñ pe kaliyāñ nit na.ī ḳhushbū luTātī hoñ

aur un par koyaleñ kū kū ke mīThe giit gaatī hoñ

vahāñ maiñ huuñ mirī ham-joliyāñ hoñ aur jhūlā ho

jahāñ barsāt ke mausam meñ sabza lahlahātā ho

havā kī chheḌ se ek ek pattā thartharātā ho

jahāñ chashmoñ kā paanī narm lai meñ gungunātā ho

vahāñ maiñ huuñ merī ham-joliyāñ hoñ aur jhūlā ho

jahāñ ūñche pahāḌoñ par ghaTā.eñ ghir ke aatī hoñ

havā kī god meñ nīlam kī pariyāñ muskurātī hoñ

aur apne nīlgūñ hoñToñ se motī meñ luTātī hoñ

vahāñ maiñ huuñ merī ham-joliyāñ hoñ aur jhūlā ho

jahāñ nahroñ meñ bahtā paanī motī sā chhalaktā ho

jahāñ chāroñ taraf gulzār meñ sabza lahaktā ho

jahāñ phūloñ kī ḳhushbuoñ se ban kā ban mahaktā ho

vahāñ maiñ huuñ mirī ham-joliyāñ hoñ aur jhūlā ho

jahāñ phūloñ kī ḳhushbuoñ se ban kā ban mahaktā ho

jahāñ bāġhoñ meñ aur khetoñ meñ har yā dil lahaktā ho

jahāñ Tesū ke ik ik phuul meñ sho.ala dahaktā ho

vahāñ maiñ huuñ mirī ham-joliyāñ hoñ aur jhūlā ho

jahāñ aamoñ ke hoñ baaġh aur koī rakhvālā na ho hargiz

koī kuttā bhī maalī ne jahāñ paalā na ho hargiz

aur ammāñ jī sā koī dekhne vaalā na ho hargiz

vahāñ maiñ huuñ mirī ham-joliyāñ hoñ aur jhūlā ho

ilāhī mere dil kī aarzū jaldī se puurī ho

vahāñ le chal jahāñ is fasl meñ jaanā zarūrī ho

marī ho shimla ho solan ho dalhozī masūrī ho

vahāñ maiñ huuñ mirī ham-joliyāñ hoñ aur jhūlā ho

jahan chiDiyan ghaneri jhaDiyon mein chahchahati hon

jahan shaKHon pe kaliyan nit nai KHushbu luTati hon

aur un par koyalen ku ku ke miThe git gati hon

wahan main hun meri ham-joliyan hon aur jhula ho

jahan barsat ke mausam mein sabza lahlahata ho

hawa ki chheD se ek ek patta thartharaata ho

jahan chashmon ka pani narm lai mein gungunata ho

wahan main hun meri ham-joliyan hon aur jhula ho

jahan unche pahaDon par ghaTaen ghir ke aati hon

hawa ki god mein nilam ki pariyan muskuraati hon

aur apne nilgun honTon se moti mein luTati hon

wahan main hun meri ham-joliyan hon aur jhula ho

jahan nahron mein bahta pani moti sa chhalakta ho

jahan chaaron taraf gulzar mein sabza lahakta ho

jahan phulon ki KHushbuon se ban ka ban mahakta ho

wahan main hun meri ham-joliyan hon aur jhula ho

jahan phulon ki KHushbuon se ban ka ban mahakta ho

jahan baghon mein aur kheton mein har ya dil lahakta ho

jahan Tesu ke ek ek phul mein shoala dahakta ho

wahan main hun meri ham-joliyan hon aur jhula ho

jahan aamon ke hon bagh aur koi rakhwala na ho hargiz

koi kutta bhi mali ne jahan pala na ho hargiz

aur amman ji sa koi dekhne wala na ho hargiz

wahan main hun meri ham-joliyan hon aur jhula ho

ilahi mere dil ki aarzu jaldi se puri ho

wahan le chal jahan is fasl mein jaana zaruri ho

mari ho shimla ho solan ho dalhozi masuri ho

wahan main hun meri ham-joliyan hon aur jhula ho