ek lamha

lamha

dil ke bahut paas se

guzrā huā sirf ek lamha

bahā le gayā hai

jaane kitne ḳhvāboñ ḳhvāhishoñ aur mansūboñ ko

bachā hai

haDDiyoñ tak dhañsā huā sannāTā

ruktī huī sāñseñ

Dūbtī huī nabz

aur sard huā jism

phir koī tez havā kā jhoñkā

Dher saarī gaD-maD āvāzeñ

chīḳh hañsī aur muskurāhaT

ghar daftar biivī bachche

aur ā.inda biis barsoñ kā mansūba

bhāgtī huī aaḌī tirchhī tasvīreñ

ek ke baad dūsre be-rabt manāzir

aur phir

Thahar gayā hai guzre hue lamhe kā saaya

Darā-Darā sahmā-sahmā dil

aur thar-thar kāñptā huā jism

lamha

dil ke bahut pas se

guzra hua sirf ek lamha

baha le gaya hai

jaane kitne KHwabon KHwahishon aur mansubon ko

bacha hai

haDDiyon tak dhansa hua sannaTa

rukti hui sansen

Dubti hui nabz

aur sard hua jism

phir koi tez hawa ka jhonka

Dher sari gaD-maD aawazen

chiKH hansi aur muskurahaT

ghar daftar biwi bachche

aur aainda bis barson ka mansuba

bhagti hui aaDi tirchhi taswiren

ek ke baad dusre be-rabt manazir

aur phir

Thahar gaya hai guzre hue lamhe ka saya

Dara-Dara sahma-sahma dil

aur thar-thar kanpta hua jism