ek manzar

pul ke us sire se aatī huī

añgusht chehre vaalī bad-sūrat aurat ke

laTke hue pistānoñ par

bhinbhinātī makkhiyoñ kī marī huī āñkhoñ meñ

sūkhī nadī ke adh-mue meñDakoñ kī sarsarāhaT

lañgḌe bhikārī kī pasliyoñ ke darmiyān

hāñptī ikāniyoñ kī

kashkolī khāñsī kī mailī shiknoñ meñ

reñgte bichchhūoñ ke saa.e

basoñ Taxiyoñ aur rickshawāoñ ke phisalte pahiyoñ tale

dauḌtī saḌkoñ kī riiḌh kī haDDiyoñ meñ

bikhartī huī tīrgī kā khurdurā lams

merī khiḌkī kī

chaukor udāsī ke piile dāñtoñ par

jamī huī pīḌhiyoñ ko khurachne kī

ek aur nākām koshish kī

siyāhiyoñ meñ gum ho jaate haiñ

pul ke us sire se aati hui

angusht chehre wali bad-surat aurat ke

laTke hue pistanon par

bhinbhinati makkhiyon ki mari hui aankhon mein

sukhi nadi ke adh-mue meinDakon ki sarsarahaT

langDe bhikari ki pasliyon ke darmiyan

hanpti ikaniyon ki

kashkoli khansi ki maili shiknon mein

rengte bichchhuon ke sae

bason Taxiyon aur rickshawaon ke phisalte pahiyon tale

dauDti saDkon ki riDh ki haDDiyon mein

bikharti hui tirgi ka khurdura lams

meri khiDki ki

chaukor udasi ke pile danton par

jami hui piDhiyon ko khurachne ki

ek aur nakaam koshish ki

siyahiyon mein gum ho jate hain