ek manzum KHat

ḳhud-kushī kar rahe ho

karo

note bhī likh ke jāoge

vo bhī likho

haañ magar ik baḌā mas.ala hai

ki jaldī meñ likkhe hue note meñ

tum jo bachpan se ab tak bhugat aa.e ho

sab nahīñ aa.egā

note meñ

master kī chhaḌī

dostoñ kī daġhā-bāziyāñ

ghar ke jhagḌoñ se zaḳhmī huī nafsiyāt

aur umīdoñ kī lāsheñ nahīñ ā.eñgī

note meñ vo badan bhī nahīñ ā.eñge

jin kī ḳhvāhish meñ tum roz marte rahe

note meñ fitrī jazbe nahīñ ā.eñge

jo kisī zābte yā 'aqīde yā maz.hab ke

Dar ke tale dab ga.e

note meñ ek hī rang-o-maz.hab ke logoñ meñ jo

zar kī miqdār kā farq hai vo nahīñ aa.egā

note meñ tum koī ik sabab ḳhud-kushī kā likhoge

jo shāyad sabab hī na ho

tum kisī shaḳhs mahbūb yā dost ko

āḳhirī call paiġhām yā ḳhat meñ batlāoge

tum ko us ke ravayye ne toḌā hai

aur vo ravayya bhī shāyad irādī na ho

phir koī to tarīqa nikāloge

jis se zamāne ko ye baat samjhā sako

ḳhud-kushī qatl hai

ḳhud-kushī qatl hai

ye mujhe to patā hai

magar yār-e-man

postmortem meñ aisā nahīñ aa.egā

to phir aisā karo

note hī na likho

call bhī na karo

balki aisā karo

ḳhud-kushī mat karo

jo masā.il tumheñ is nahaj par le aa.e haiñ

vo sab ke sab

aur bhī kitne logoñ ko darpesh haiñ

un se bhī pūchh lo

mujh ko lagtā hai sab mil ke socheñ

to saare masā.il kā hal bhī nikal aa.egā

ḳhud-kushī buzdilī to nahīñ hai magar

aur bhī kitne raste laḌā.ī ke haiñ

KHud-kushi kar rahe ho

karo

note bhi likh ke jaoge

wo bhi likho

han magar ek baDa masala hai

ki jaldi mein likkhe hue note mein

tum jo bachpan se ab tak bhugat aae ho

sab nahin aaega

note mein

master ki chhaDi

doston ki dagha-baziyan

ghar ke jhagDon se zaKHmi hui nafsiyat

aur umidon ki lashen nahin aaengi

note mein wo badan bhi nahin aaenge

jin ki KHwahish mein tum roz marte rahe

note mein fitri jazbe nahin aaenge

jo kisi zabte ya 'aqide ya mazhab ke

Dar ke tale dab gae

note mein ek hi rang-o-mazhab ke logon mein jo

zar ki miqdar ka farq hai wo nahin aaega

note mein tum koi ek sabab KHud-kushi ka likhoge

jo shayad sabab hi na ho

tum kisi shaKHs mahbub ya dost ko

aaKHiri call paigham ya KHat mein batlaoge

tum ko us ke rawayye ne toDa hai

aur wo rawayya bhi shayad iradi na ho

phir koi to tariqa nikaloge

jis se zamane ko ye baat samjha sako

KHud-kushi qatl hai

KHud-kushi qatl hai

ye mujhe to pata hai

magar yar-e-man

postmortem mein aisa nahin aaega

to phir aisa karo

note hi na likho

call bhi na karo

balki aisa karo

KHud-kushi mat karo

jo masail tumhein is nahaj par le aae hain

wo sab ke sab

aur bhi kitne logon ko darpesh hain

un se bhi puchh lo

mujh ko lagta hai sab mil ke sochen

to sare masail ka hal bhi nikal aaega

KHud-kushi buzdili to nahin hai magar

aur bhi kitne raste laDai ke hain