ek nae lafz ki taKHliq

zindagī lafz hai

maut bhī lafz hai

zindagī kī tarāshī huī avvalīñ saut se sarhad-e-maut tak lafz hī lafz haiñ

saañs bhī lafz hai

saañs lene kī har ik zarūrat bhī lafzoñ kī muhtāj hai

aag paanī havā ḳhaak sab lafz haiñ

aañkh chehra jabīñ haath lab lafz haiñ

sub.h-o-shām-o-shafaq roz-o-shab lafz haiñ

vaqt bhī lafz hai

vaqt kā sāz-o-āhañg bhī

rañg bhī sañg bhī

amn bhī jañg bhī

lafz hī lafz haiñ

phuul bhī lafz hai

dhuul bhī lafz hai

lafz qātil bhī hai

lafz maqtūl bhī

lafz hī ḳhūñ-bahā

lafz dast-e-duā

lafz arz-o-samā

sub.h-e-fasl-e-bahārāñ bhī ik lafz hai

shām-e-hijr-e-nigārāñ bhī ik lafz hai

raunaq-e-bazm-e-yārāñ bhī ik lafz hai

mahfil-e-dil-figārāñ bhī ik lafz hai

maiñ bhī ik lafz huuñ

tū bhī ik lafz hai

aa ki lafzoñ kī sūrat fazāoñ meñ mil kar bikhar jaa.eñ ham

ik nayā lafz taḳhlīq kar jaa.eñ ham

aa ki mar jaa.eñ ham

zindagi lafz hai

maut bhi lafz hai

zindagi ki tarashi hui awwalin saut se sarhad-e-maut tak lafz hi lafz hain

sans bhi lafz hai

sans lene ki har ek zarurat bhi lafzon ki muhtaj hai

aag pani hawa KHak sab lafz hain

aankh chehra jabin hath lab lafz hain

subh-o-sham-o-shafaq roz-o-shab lafz hain

waqt bhi lafz hai

waqt ka saz-o-ahang bhi

rang bhi sang bhi

amn bhi jang bhi

lafz hi lafz hain

phul bhi lafz hai

dhul bhi lafz hai

lafz qatil bhi hai

lafz maqtul bhi

lafz hi KHun-baha

lafz dast-e-dua

lafz arz-o-sama

subh-e-fasl-e-bahaaran bhi ek lafz hai

sham-e-hijr-e-nigaran bhi ek lafz hai

raunaq-e-bazm-e-yaran bhi ek lafz hai

mahfil-e-dil-figaran bhi ek lafz hai

main bhi ek lafz hun

tu bhi ek lafz hai

aa ki lafzon ki surat fazaon mein mil kar bikhar jaen hum

ek naya lafz taKHliq kar jaen hum

aa ki mar jaen hum