ek nazm

dānish-var kahlāne vaalo

tum kyā samjho

mub.ham chīzeñ kyā hotī haiñ

thal ke registān meñ rahne vaale logo

tum kyā jaano

sāvan kyā hai

apne badan ko

raat meñ andhī tārīkī se

din meñ ḳhud apne hāthoñ se

Dhāñpne vaalo

uryāñ logo

tum kyā jaano

cholī kyā hai dāman kyā hai

shahr-badar ho jaane vaalo

fuTpāthoñ par sone vaalo

tum kyā samjho

chhat kyā hai dīvāreñ kyā haiñ

āñgan kyā hai

ik laḌkī kā ḳhizāñ-rasīda baazū thāme

nabz ke uupar haath jamā.e

ek sadā par kaan lagā.e

dhaḌkan sāñseñ ginñe vaalo

tum kyā jaano

mub.ham chīzeñ kyā hotī haiñ

dhaḌkan kyā hai jīvan kyā hai

sattarah-number ke bistar par

apnī qaid kā lamha lamha ginñe vaalī

ye laḌkī jo

barsoñ kī bīmār nazar aatī hai tum ko

sola saal kī ik beva hai

hañste hañste ro paḌtī hai

andar tak se bhiig chukī hai

jaan chukī hai

sāvan kyā hai

is se pūchho

kāñch kā bartan kyā hotā hai

is se pūchho

mub.ham chīzeñ kyā hotī haiñ

suunā āñgan tanhā jīvan kyā hotā hai

danish-war kahlane walo

tum kya samjho

mubham chizen kya hoti hain

thal ke registan mein rahne wale logo

tum kya jaano

sawan kya hai

apne badan ko

raat mein andhi tariki se

din mein KHud apne hathon se

Dhanpne walo

uryan logo

tum kya jaano

choli kya hai daman kya hai

shahr-badar ho jaane walo

fuTpathon par sone walo

tum kya samjho

chhat kya hai diwaren kya hain

aangan kya hai

ek laDki ka KHizan-rasida bazu thame

nabz ke upar hath jamae

ek sada par kan lagae

dhaDkan sansen ginne walo

tum kya jaano

mubham chizen kya hoti hain

dhaDkan kya hai jiwan kya hai

sattarah-number ke bistar par

apni qaid ka lamha lamha ginne wali

ye laDki jo

barson ki bimar nazar aati hai tum ko

sola sal ki ek bewa hai

hanste hanste ro paDti hai

andar tak se bhig chuki hai

jaan chuki hai

sawan kya hai

is se puchho

kanch ka bartan kya hota hai

is se puchho

mubham chizen kya hoti hain

suna aangan tanha jiwan kya hota hai