ek nazm

maiñ sard-mehr zindagī se kyā talab karūñ

talab to ek bahr hai

zindagī to saañs kī lapaktī ek lahar hai

jo aa ke phir guzar ga.ī

chand saal us ke naqsh-e-pā

yahīñ kahīñ kisī ke zehn meñ rahe

maiñ dekhtā huuñ

shāḳh-e-umr zard mausamoñ kī dhuup meñ

isī ḳhayāl-e-ḳhām meñ

ki vaqt ghaḌī kī qaid meñ hai

barg barg jhuk ga.ī hai

zindagī ne kyā diyā mujhe

tarah tarah ke ārize dimāġh kā buḳhār

iḳhtilāl aur havās ke shu.ūr kā malāl

raat ko maiñ jāgtā rahūñ

tamām din baqā kī aarzū meñ afsaroñ ke ḳhauf se

nashist-gāh-e-intizār meñ bahut hī phīkī muskurāhaToñ ke saath

faisle ke intizār meñ lahū kī gardishoñ ke saath

zaat kī aziim saltanat ko aag meñ lipTā dekhtā rahūñ

ye cigaretoñ kā nīl-gūñ dhuāñ ġhubār hī ġhubār

bhāgtā savār asp kā sunahrī na.al rāste meñ chhoḌ kar kidhar gayā

ye shor ab kidhar se aa rahā hai

ġhaur se suno

nahīñ ye kuchh nahīñ

maiñ intizār kī tavīl sā.atoñ meñ nāḳhunoñ se mez ko bajā rahā huuñ

par vo kāġhazoñ meñ ġharq hai

bahut qadīm raat ibtidā se intihā ke lā-zavāl bahr meñ utar gayā huuñ

saare din ke ġham ko maiñ

nashe kī ik ridā meñ Dhāñp duuñ

magar nasha harām jurm hai

to phir palaT ke maiñ ḳhayāl meñ muqīm ishratoñ ko ā.inoñ meñ dekh luuñ

lazīz thartharāte jism

Dhol kī dhamak pe lahar lahar khil rahe haiñ

al-amāñ muharramāt

maiñ sard-mehr zindagī se kyā talab karūñ

ki vo bhī ḳhud asiir hai

main sard-mehr zindagi se kya talab karun

talab to ek bahr hai

zindagi to sans ki lapakti ek lahar hai

jo aa ke phir guzar gai

chand sal us ke naqsh-e-pa

yahin kahin kisi ke zehn mein rahe

main dekhta hun

shaKH-e-umr zard mausamon ki dhup mein

isi KHayal-e-KHam mein

ki waqt ghaDi ki qaid mein hai

barg barg jhuk gai hai

zindagi ne kya diya mujhe

tarah tarah ke aarize dimagh ka buKHar

iKHtilal aur hawas ke shuur ka malal

raat ko main jagta rahun

tamam din baqa ki aarzu mein afsaron ke KHauf se

nashist-gah-e-intizar mein bahut hi phiki muskurahaTon ke sath

faisle ke intizar mein lahu ki gardishon ke sath

zat ki azim saltanat ko aag mein lipTa dekhta rahun

ye cigareton ka nil-gun dhuan ghubar hi ghubar

bhagta sawar asp ka sunahri nal raste mein chhoD kar kidhar gaya

ye shor ab kidhar se aa raha hai

ghaur se suno

nahin ye kuchh nahin

main intizar ki tawil saaton mein naKHunon se mez ko baja raha hun

par wo kaghazon mein gharq hai

bahut qadim raat ibtida se intiha ke la-zawal bahr mein utar gaya hun

sare din ke gham ko main

nashe ki ek rida mein Dhanp dun

magar nasha haram jurm hai

to phir palaT ke main KHayal mein muqim ishraton ko aainon mein dekh lun

laziz thartharaate jism

Dhol ki dhamak pe lahar lahar khil rahe hain

al-aman muharramat

main sard-mehr zindagi se kya talab karun

ki wo bhi KHud asir hai