ek nazm

gaaḌī guzar ga.ī

dhueñ aur dhuul kī chhatrī ne

miTTī ko Dhāñp diyā

kabūtar ḳhush-ilhān muazzin ke

eraab juḌe jumloñ ke biich

kābuk se sar Takrātā hai

TuuTī mez pe maiñ ne āñkheñ rakhī haiñ

aur gaThrī ban kar

kursī pe baiThā huuñ

maiñ jo apne maile kafan kī soñdhī ḳhushbū

sūñgh chukā huuñ jaan gayā huuñ

ik yā do farlāñg farār kā rāsta hai

jiinā jiite rahnā hī ne.amat hai

jañgal hai aur girye kī shāḳhoñ se dast-e-savāl

kaasa ban kar laTkā hai

maiñ kaase meñ chhup kar baiThā huuñ

ghar kā saarā sāz-o-sāmān bech kar niklā huuñ

ye soch kar ghar se niklā huuñ

gaDi guzar gai

dhuen aur dhul ki chhatri ne

miTTi ko Dhanp diya

kabutar KHush-ilhan muazzin ke

erab juDe jumlon ke bich

kabuk se sar Takraata hai

TuTi mez pe main ne aankhen rakhi hain

aur gaThri ban kar

kursi pe baiTha hun

main jo apne maile kafan ki sondhi KHushbu

sungh chuka hun jaan gaya hun

ek ya do farlang farar ka rasta hai

jina jite rahna hi neamat hai

jangal hai aur girye ki shaKHon se dast-e-sawal

kasa ban kar laTka hai

main kase mein chhup kar baiTha hun

ghar ka sara saz-o-saman bech kar nikla hun

ye soch kar ghar se nikla hun