ek nazm

kabhī agar tum zamīñ se guzro zamīñ jo ham sab kī saltanat hai

to jis taraf ik kalī ke mohre pe chāñdnī apnā naam ḳhud hai

vahāñ zarā der ke liye apnī umar kī raft-o-būd roko

zamīñ ko lamhoñ kī bādshāhat meñ dekhnā chāho

is tarīqe se ārzūoñ ke saath dekho

ki jis tarah log apne mahbūb ke badan ko

vafāt ke vaqt dekhte haiñ

maiñ kuchh nahīñ apne giit kā apnī maut kā nāma-bar huuñ

aksar zamīñ kī qismat meñ jitnī zardī hai vo huuñ lekin hazār qīmat

vo shai huuñ jis kī ināyatoñ se kabhī sitāre zamīñ pe raushan haiñ

gaah dil meñ bahār aur us ke ḳhair-maqdam kā mājrā haiñ

isī liye jab kabhī tumhārā guzar ho aur din ke nek sūraj

ḳhud apne mausam kī bādshāhat hoñ, to jahāñ āñsuoñ ke chashme

firāq kī os haiñ vahāñ apnī chaap ke saath

mere saa.e kī raushnī meñ kabhī mirā zikr karnā chāho

to ḳhud ko samjho maiñ ḳhud huuñ aur tum mire hī mausam kā abr ho

abr jo zamīn hī kī milkiyat kā

ġhubār bhī bahr bhī hai rahmat kā abr bhī hai

ḳhāmoshiyāñ mere saath saarī bahār kā mo.ajaza haiñ

saaya jahāñ guzishta ka.ī dinoñ se taḌap rahā hai

vahāñ purānī zamīñ ne kaliyoñ kā taaj pheñkā hai

aur duniyā ka.ī mahīnoñ ke ba.ad yuuñ ḳhushnumā hai jaise

mirā muqaddar tirī tamannā se ḳhushnumā hai

kabhi agar tum zamin se guzro zamin jo hum sab ki saltanat hai

to jis taraf ek kali ke mohre pe chandni apna nam KHud hai

wahan zara der ke liye apni umar ki raft-o-bud roko

zamin ko lamhon ki baadshahat mein dekhna chaho

is tariqe se aarzuon ke sath dekho

ki jis tarah log apne mahbub ke badan ko

wafat ke waqt dekhte hain

main kuchh nahin apne git ka apni maut ka nama-bar hun

aksar zamin ki qismat mein jitni zardi hai wo hun lekin hazar qimat

wo shai hun jis ki inayaton se kabhi sitare zamin pe raushan hain

gah dil mein bahaar aur us ke KHair-maqdam ka majra hain

isi liye jab kabhi tumhaara guzar ho aur din ke nek suraj

KHud apne mausam ki baadshahat hon, to jahan aansuon ke chashme

firaq ki os hain wahan apni chap ke sath

mere sae ki raushni mein kabhi mera zikr karna chaho

to KHud ko samjho main KHud hun aur tum mere hi mausam ka abr ho

abr jo zamin hi ki milkiyat ka

ghubar bhi bahr bhi hai rahmat ka abr bhi hai

KHamoshiyan mere sath sari bahaar ka moajaza hain

saya jahan guzishta kai dinon se taDap raha hai

wahan purani zamin ne kaliyon ka taj phenka hai

aur duniya kai mahinon ke baad yun KHushnuma hai jaise

mera muqaddar teri tamanna se KHushnuma hai