ek nazm

raat ke ḳhvāboñ kā ik turfa samāñ hotā hai

sub.h ke gūñjte āvāze se chauñk uThtā huuñ

saañs letā huuñ bahar-kaif gumāñ hotā hai

uñgliyāñ phertā huuñ apne badan par ab to

kārvāñ hosh kā yādoñ kā ravāñ hotā hai

ye nayā din hai magar vaqt kahāñ Thahrā hai

sāmne khūñTī se laTkā hai mirā garm libās

jis pe ḳhud-sāḳhta pābandiyoñ kā pahrā hai

jin ke saa.e meñ abhī mujh ko ravāñ honā hai

merī tahzīb kā har zaḳhm bahut gahrā hai

aur bhī jāgne vaale haiñ ḳhayāl aate haiñ

sochtā huuñ mirī sūrat kahīñ vo bhī uTh kar

dard sahte haiñ kabhī dard ko sahlāte haiñ

jaane kis jurm kī pādāsh meñ yuuñ ghultā huuñ

log to varna isī baat pe itrāte haiñ

duur be-dhyānī meñ ghaḌiyāl sadā detā hai

zehan dil jism har ik chiiz chamak uThtī hai

maar kar koḌe koī jaise uThā detā hai

Dar ke sab bhāgte haiñ khetoñ ko maidānoñ ko

vaqt bhaTke huoñ ko rah pe lagā detā hai

lahlahāte hue gandum ke sajīle paudo

muskurāte hue khetoñ ke muhāfiz peḌo

jhūmtī Tahniyoñ ko vajd meñ laate patto

mujh ko qudrat do ki maiñ tum ko sarāhūñ chāhūñ

shahr ke sehr ko toḌūñ tumheñ pālūñ dekhūñ

raat ke KHwabon ka ek turfa saman hota hai

subh ke gunjte aawaze se chaunk uThta hun

sans leta hun bahar-kaif guman hota hai

ungliyan pherta hun apne badan par ab to

karwan hosh ka yaadon ka rawan hota hai

ye naya din hai magar waqt kahan Thahra hai

samne khunTi se laTka hai mera garm libas

jis pe KHud-saKHta pabandiyon ka pahra hai

jin ke sae mein abhi mujh ko rawan hona hai

meri tahzib ka har zaKHm bahut gahra hai

aur bhi jagne wale hain KHayal aate hain

sochta hun meri surat kahin wo bhi uTh kar

dard sahte hain kabhi dard ko sahlate hain

jaane kis jurm ki padash mein yun ghulta hun

log to warna isi baat pe itraate hain

dur be-dhyani mein ghaDiyal sada deta hai

zehan dil jism har ek chiz chamak uThti hai

mar kar koDe koi jaise uTha deta hai

Dar ke sab bhagte hain kheton ko maidanon ko

waqt bhaTke huon ko rah pe laga deta hai

lahlahate hue gandum ke sajile paudo

muskuraate hue kheton ke muhafiz peDo

jhumti Tahniyon ko wajd mein late patto

mujh ko qudrat do ki main tum ko sarahun chahun

shahr ke sehr ko toDun tumhein palun dekhun