ek pul banaya ja raha hai

maiñ un se pūchhtā huuñ:

pul kaise banāyā jaatā hai

pul banāne vaale kahte haiñ:

tum ne kabhī mohabbat nahīñ kī

maiñ kahtā huuñ: mohabbat kyā chiiz hai

vo apne auzār rakhte hue kahte haiñ:

mohabbat kā matlab jānñā chāhte ho

to pahle dariyā se milo...

rū-e-zamīn par dariyā se zyāda mohabbat karne vaalā koī nahīñ

dariyā apne samundar kī taraf bahtā rahtā hai

ye supurdagī hai

ye supurdagī bachpan hai aur bachpan bahisht...

lekin bahisht tak pahuñchne ke liye ek jahannam se guzarnā paḌtā hai

maiñ pūchhtā huuñ jahannam kyā hai?

vo kahte haiñ: is savāl kā javāb daraḳhtoñ ke paas hai

koī bhī mausam ho vo apnī jagah nahīñ chhoḌte

unheñ miTTī se mohabbat hai

unheñ parindoñ aur chiyūñTiyoñ se mohabbat hai

jo un ke jism meñ ghar banātī haiñ

'ghar kyā hai?' maiñ pūchhtā huuñ?

vo sab hañsne lagte haiñ

pahlā mazdūr kahtā hai:

apnī aurat kī taraf jaao

har savāl kā javāb mil jā.egā

main un se puchhta hun:

pul kaise banaya jata hai

pul banane wale kahte hain:

tum ne kabhi mohabbat nahin ki

main kahta hun: mohabbat kya chiz hai

wo apne auzar rakhte hue kahte hain:

mohabbat ka matlab jaanna chahte ho

to pahle dariya se milo

ru-e-zamin par dariya se zyaada mohabbat karne wala koi nahin

dariya apne samundar ki taraf bahta rahta hai

ye supurdagi hai

ye supurdagi bachpan hai aur bachpan bahisht

lekin bahisht tak pahunchne ke liye ek jahannam se guzarna paDta hai

main puchhta hun jahannam kya hai?

wo kahte hain: is sawal ka jawab daraKHton ke pas hai

koi bhi mausam ho wo apni jagah nahin chhoDte

unhen miTTi se mohabbat hai

unhen parindon aur chiyunTiyon se mohabbat hai

jo un ke jism mein ghar banati hain

'ghar kya hai?' main puchhta hun?

wo sab hansne lagte hain

pahla mazdur kahta hai:

apni aurat ki taraf jao

har sawal ka jawab mil jaega