ek rote hue aadmi ko dekh kar

ajnabī dost, bahut der meñ royā hai tuu!

apnī āvāz ke sannāTe meñ baiThe baiThe.

aur āñkhoñ se ubhar aa.ī hai sayyāl-e-fuġhāñ

apnī majbūriyāñ lāchāriyāñ bikhrātī huī

reg-e-hastī ke nizāmāt se jhunjhlātī huii.

ai udāsī kī fazāoñ ke parinde ye batā

apne anfās ke tārīk bayābānoñ meñ

aur tū kyā hai zamānoñ kī siyāhī ke sivā,

aur tū kyā hai sarāboñ kī gavāhī ke sivā,

raat meñ sard sitāroñ kī jamāhī ke sivaa.

tire chehre kī zamīñ par jo namī hai ab bhī

dil kī sab bastiyāñ us meñ hī ThiThur jaatī haiñ,

apne sahme se kināroñ pe thapeḌe khā kar

ab bhī duniyā ke sisakne kī sadā aatī hai.

ajnabī dost, ai mānūs muqaddar ke makīñ

apnī āvāz ke sannāTe meñ baiThe baiThe

ye bhī kyā kam hai ki tū apne javāñ ashkoñ se

apne hālāt ke dāman ko bhigo saktā hai

us jahāñ meñ ki jahāñ suukh gayā hai sab kuchh

ye bhī kyā kam hai ki tū aaj bhī ro saktā hai!

ajnabi dost, bahut der mein roya hai tu!

apni aawaz ke sannaTe mein baiThe baiThe

aur aankhon se ubhar aai hai sayyal-e-fughan

apni majburiyan lachaariyan bikhraati hui

reg-e-hasti ke nizamat se jhunjhlati hui

ai udasi ki fazaon ke parinde ye bata

apne anfas ke tarik bayabanon mein

aur tu kya hai zamanon ki siyahi ke siwa,

aur tu kya hai sarabon ki gawahi ke siwa,

raat mein sard sitaron ki jamahi ke siwa

tere chehre ki zamin par jo nami hai ab bhi

dil ki sab bastiyan us mein hi ThiThur jati hain,

apne sahme se kinaron pe thapeDe kha kar

ab bhi duniya ke sisakne ki sada aati hai

ajnabi dost, ai manus muqaddar ke makin

apni aawaz ke sannaTe mein baiThe baiThe

ye bhi kya kam hai ki tu apne jawan ashkon se

apne haalat ke daman ko bhigo sakta hai

us jahan mein ki jahan sukh gaya hai sab kuchh

ye bhi kya kam hai ki tu aaj bhi ro sakta hai!