ek sawal

tamām umr jo apne liye na maañg sakī

vo sab duā.eñ tumhāre liye hī māñgī haiñ

har ik duā meñ tumhārā hī naam lab pe rahā

har ek harf-e-mohabbat tumhāre naam rahā

ga.ī rutoñ ke hasīñ ḳhvāb saath saath chale

Dagar Dagar pe tumhārā hī naam likhte chale

jo lauh-e-sāda par ik baar terā naam likhā

ġhubār-e-gard-e-zamāna use miTā na sakā

ye aur baat ki ab ijtināb hai tujh se

ye aur baat ki dil ehtisāb kartā hai

ye aur baat ki harf-e-yaqīn sard hue

ye aur baat ki lafzoñ ke phuul zard hue

chahār samt koī dhund phailī jaatī hai

talāsh maazī ke ujle ḳhayāl kaise karūñ

tumheñ manā.ūñ to merī anā ko choT lage

tumheñ bhulā.ūñ to dil hī udaas ho jaa.e

ye sach hai sach hai gurezāñ rahe magar phir bhī

batāo dil kī tapish kyā kabhī huī mahsūs

tamam umr jo apne liye na mang saki

wo sab duaen tumhaare liye hi mangi hain

har ek dua mein tumhaara hi nam lab pe raha

har ek harf-e-mohabbat tumhaare nam raha

gai ruton ke hasin KHwab sath sath chale

Dagar Dagar pe tumhaara hi nam likhte chale

jo lauh-e-sada par ek bar tera nam likha

ghubar-e-gard-e-zamana use miTa na saka

ye aur baat ki ab ijtinab hai tujh se

ye aur baat ki dil ehtisab karta hai

ye aur baat ki harf-e-yaqin sard hue

ye aur baat ki lafzon ke phul zard hue

chahaar samt koi dhund phaili jati hai

talash mazi ke ujle KHayal kaise karun

tumhein manaun to meri ana ko choT lage

tumhein bhulaun to dil hi udas ho jae

ye sach hai sach hai gurezan rahe magar phir bhi

batao dil ki tapish kya kabhi hui mahsus