ek shaera ki shadi par

ai ki thā uns tujhe ishq ke afsānoñ se

zindagānī tirī ābād thī rūmānoñ se

sher kī god meñ paltī thī javānī terī

tere sheroñ se ubaltī thī javānī terī

rashk-e-firdaus thā har husn bharā ḳhvāb tirā

ek pāmāl khilaunā thā ye mahtāb tirā

nik.hat-e-sher se mahkī huī rahtī thī sadā

nashshā-e-fikr meñ bahkī huī rahtī thī sadā

shirkat-e-ġhair se begāna the naġhme tere

ismat-e-hūr kā afsāna the naġhme tere

sher kī ḳhalvat-e-rañgīñ thī parī-ḳhāna tirā

mast ḳhvāboñ ke jazīroñ meñ thā kāshāna tirā

ġhā.eb-az-chashm thī jannat kī bahāroñ kī tarah

dast-e-insāñ se thī mahfūz sitāroñ kī tarah

sohbat-e-ġhair se ghabrātī thī tanhā.ī tirī

ā.īñe se bhī to sharmātī thī tanhā.ī tirī

sub.h kī tarah se doshīza thī hastī terī

bū-e-gul kī tarah pākīza thī hastī terī

naġhma-o-sher ke firdaus meñ tū rahtī thī

yaksar ilhām o tarannum thā jo tū kahtī thī

tere ash.ār the jannat kī bahāroñ ke hujūm

tere afkār the zarrīn sitāroñ ke hujūm

dard-e-sherī ke ta.assur se to maġhmūm thī tū

āsmāñ kā magar ik ġhuncha-e-ma.asūm thī tū

mauj-e-kausar kā chhalaktā huā paimāna thī

ġhair hoñToñ ke tasavvur se bhī begāna thī

ab gavārā huī kyuuñ ġhair kī sohbat tujh ko

kyuuñ pasand aa ga.ī nā-jins kī shirkat tujh ko

auj-e-taqdīs ko pastī kī adā bhā ga.ī kyuuñ

terī tanhā.ī kī jannat pe ḳhizāñ chhā ga.ī kyuuñ

sher o rūmān ke vo ḳhvāb kahāñ haiñ tere

vo nuqūsh-e-gul-o-mahtāb kahāñ haiñ tere

kaun sī turfa adā bhā ga.ī is duniyā meñ

ḳhuld ko chhoḌ ke kyuuñ aa ga.ī is duniyā meñ

ho ga.ī aam tū nūr-e-mah-e-tābāñ kī tarah

aah kyuuñ jal na bujhī sham-e-shabistāñ kī tarah

apnī doshīza bahāroñ ko na khonā thā kabhī

vo kalī thī tū jise phuul na honā thā kabhī

iffateñ miT ke javānī ko miTā jaatī haiñ

phuul kumhlāte haiñ kaliyāñ kahīñ kumhlātī haiñ

bulbul-e-mast-navā dasht meñ kyuuñ rahne lagī

naġhma-e-tar kī jagah marsiya kyuuñ kahne lagī

havas-ālūda huī paak javānī terī

ġhair kī raat hai ab aur kahānī terī

kis ko ma.alūm thā tū is qadar arzāñ hogī

zīnat-e-mahfil o pāmāl-e-shabistāñ hogī

jazb-e-iffat kā mayassar thā jo irfāñ tujh ko

kyuuñ na marġhūb huā sheva-e-jānāñ tujh ko

tīrgī hirs kī hūroñ ko bhī bahkā hī ga.ī

tere bistar pe bhī āḳhir ko shikan aa hī ga.ī

ab nahīñ tujh meñ vo hūroñ kī sī iffat baaqī

huur thī tujh meñ, ga.ii, rah ga.ī aurat baaqī

haañ vo aurat jise bachchoñ kā fasāna kahiye

barbat-e-nafs kā ik fuhsh tarāna kahiye

jis meñ hai zahr ufūnat kā vo paimāna kaheñ

ik gunāhoñ kā bhabhaktā huā mai-ḳhāna kaheñ

nauha-ḳhvāñ apnī javāñ maut kā hone de mujhe

muskurā tū magar is haal pe rone de mujhe

ai ki tha uns tujhe ishq ke afsanon se

zindagani teri aabaad thi rumanon se

sher ki god mein palti thi jawani teri

tere sheron se ubalti thi jawani teri

rashk-e-firdaus tha har husn bhara KHwab tera

ek pamal khilauna tha ye mahtab tera

nikhat-e-sher se mahki hui rahti thi sada

nashsha-e-fikr mein bahki hui rahti thi sada

shirkat-e-ghair se begana the naghme tere

ismat-e-hur ka afsana the naghme tere

sher ki KHalwat-e-rangin thi pari-KHana tera

mast KHwabon ke jaziron mein tha kashana tera

ghaeb-az-chashm thi jannat ki bahaaron ki tarah

dast-e-insan se thi mahfuz sitaron ki tarah

sohbat-e-ghair se ghabraati thi tanhai teri

aaine se bhi to sharmati thi tanhai teri

subh ki tarah se doshiza thi hasti teri

bu-e-gul ki tarah pakiza thi hasti teri

naghma-o-sher ke firdaus mein tu rahti thi

yaksar ilham o tarannum tha jo tu kahti thi

tere ashaar the jannat ki bahaaron ke hujum

tere afkar the zarrin sitaron ke hujum

dard-e-sheri ke tassur se to maghmum thi tu

aasman ka magar ek ghuncha-e-masum thi tu

mauj-e-kausar ka chhalakta hua paimana thi

ghair honTon ke tasawwur se bhi begana thi

ab gawara hui kyun ghair ki sohbat tujh ko

kyun pasand aa gai na-jins ki shirkat tujh ko

auj-e-taqdis ko pasti ki ada bha gai kyun

teri tanhai ki jannat pe KHizan chha gai kyun

sher o ruman ke wo KHwab kahan hain tere

wo nuqush-e-gul-o-mahtab kahan hain tere

kaun si turfa ada bha gai is duniya mein

KHuld ko chhoD ke kyun aa gai is duniya mein

ho gai aam tu nur-e-mah-e-taban ki tarah

aah kyun jal na bujhi sham-e-shabistan ki tarah

apni doshiza bahaaron ko na khona tha kabhi

wo kali thi tu jise phul na hona tha kabhi

iffaten miT ke jawani ko miTa jati hain

phul kumhlate hain kaliyan kahin kumhlati hain

bulbul-e-mast-nawa dasht mein kyun rahne lagi

naghma-e-tar ki jagah marsiya kyun kahne lagi

hawas-aluda hui pak jawani teri

ghair ki raat hai ab aur kahani teri

kis ko malum tha tu is qadar arzan hogi

zinat-e-mahfil o pamal-e-shabistan hogi

jazb-e-iffat ka mayassar tha jo irfan tujh ko

kyun na marghub hua shewa-e-jaanan tujh ko

tirgi hirs ki huron ko bhi bahka hi gai

tere bistar pe bhi aaKHir ko shikan aa hi gai

ab nahin tujh mein wo huron ki si iffat baqi

hur thi tujh mein, gai, rah gai aurat baqi

han wo aurat jise bachchon ka fasana kahiye

barbat-e-nafs ka ek fuhsh tarana kahiye

jis mein hai zahr ufunat ka wo paimana kahen

ek gunahon ka bhabhakta hua mai-KHana kahen

nauha-KHwan apni jawan maut ka hone de mujhe

muskura tu magar is haal pe rone de mujhe