ek sham

yuuñ to lamhoñ ke is tasalsul meñ

ab se pahle bhī umr kaTtī thī

mom-battī kī raushnī meñ nazar

hāfize ke varaq ulaTtī thī

ret ke sogvār Tīloñ par

chāñdnī raat bhar bhaTaktī thī

aaj lekin thake hue dil par

jism kā taar taar bhārī hai

shaam kī dam-ba-ḳhud havāoñ par

sub.h kā intizār bhārī hai

maqbaroñ se uThī huī āñdhī

Tahniyoñ se ulajh ke chaltī hai

ḳhushk palkoñ pe āñsuoñ kī umiid

pai-ba-pai karvaTeñ badaltī hai

ek ik aks saañs letā hai

ek ik yaad aañkh maltī hai

jaise sahrā meñ sar jhukā.e hue

hājiyoñ kī qatār chaltī hai

zard chiñgāriyoñ ke dāman meñ

yuuñ sulagtā hai sard ātish-dān

jaise bachchoñ kī bhuuk ke aage

ek nādār baap kā īmān

dam-ba-ḳhud ḳhāmushī meñ dhīre se

zard patte qadam uThāte haiñ

yaad ke kārvāñ añdhere meñ

ḳhvāb kī tarah sarsarāte haiñ

khiḌkiyoñ ke Dare hue chehre

apnī aahaT se kaañp jaate haiñ

dil kī qurbān gaah ke aage

ek TuuTā huā diyā bhī nahīñ

kisī pīpal ke narm saa.e meñ

koī patthar kā devtā bhī nahīñ

ruuh ke kāsa-e-gadā.ī ko

chaar TukḌoñ kā aasrā bhī nahīñ

lambī chauḌī saḌak ke dāman par

qumqume sahme sahme jalte haiñ

jaise aksar baḌe gharānoñ meñ

fāqa-kash rishta-dār palte haiñ

sochtā huuñ ki is dayār se duur

ek aisā bhī des hai jis kī

raat tāroñ meñ saj ke aa.egī

sub.h hogī to ghar ke goshoñ meñ

terī ma.asūm muskurāhaT kī

narm sī dhuup phail jā.egī

yun to lamhon ke is tasalsul mein

ab se pahle bhi umr kaTti thi

mom-batti ki raushni mein nazar

hafize ke waraq ulaTti thi

ret ke sogwar Tilon par

chandni raat bhar bhaTakti thi

aaj lekin thake hue dil par

jism ka tar tar bhaari hai

sham ki dam-ba-KHud hawaon par

subh ka intizar bhaari hai

maqbaron se uThi hui aandhi

Tahniyon se ulajh ke chalti hai

KHushk palkon pe aansuon ki umid

pai-ba-pai karwaTen badalti hai

ek ek aks sans leta hai

ek ek yaad aankh malti hai

jaise sahra mein sar jhukae hue

hajiyon ki qatar chalti hai

zard chingariyon ke daman mein

yun sulagta hai sard aatish-dan

jaise bachchon ki bhuk ke aage

ek nadar bap ka iman

dam-ba-KHud KHamushi mein dhire se

zard patte qadam uThate hain

yaad ke karwan andhere mein

KHwab ki tarah sarsaraate hain

khiDkiyon ke Dare hue chehre

apni aahaT se kanp jate hain

dil ki qurban gah ke aage

ek TuTa hua diya bhi nahin

kisi pipal ke narm sae mein

koi patthar ka dewta bhi nahin

ruh ke kasa-e-gadai ko

chaar TukDon ka aasra bhi nahin

lambi chauDi saDak ke daman par

qumqume sahme sahme jalte hain

jaise aksar baDe gharanon mein

faqa-kash rishta-dar palte hain

sochta hun ki is dayar se dur

ek aisa bhi des hai jis ki

raat taron mein saj ke aaegi

subh hogi to ghar ke goshon mein

teri masum muskurahaT ki

narm si dhup phail jaegi