ek sharminda nazm

kin harfoñ kī tafhīm karūñ

kin rañgoñ kī tajsīm karūñ

kis raah chalūñ aur chaltā jā.ūñ khulā nahīñ

abhī darvāza to khulā nahīñ

kis phuul kī mad.h likhūñ

ai harf-e-sahar-āsār ai yaum-e-āzādī

maiñ ne to nahīñ dekhā

tire lams se kaun sā sañg gulāb huā aa.ina aab huā

is baaġh meñ kaun sī musht-e-ḳhāk khulī ḳhushbū āzād huī

be-bas aur saat bahāreñ aur ḳhizā.eñ

ek hī mausam kī ajrak maiñ dekh chukā huuñ

lekin maiñ ne vo din kis din dekhā hai

jab āñkheñ rauzan chhoḌ ke phūloñ kī kyārī meñ bas jaatī haiñ koyal gaatī hai

koyal gaatī hai

jhūle paḌte haiñ bāġhoñ meñ

husn se reza reza vasl Tapaktā hai

maiñ ne kab dekhā hai

abhī darvāza to khulā nahīñ

abhī darvāza to khulā nahīñ

darvāza khule to maiñ bhī qalam meñ taaza havā kī siyāhī bhar luuñ aur ik ḳhat likhūñ

maiñ tere pate par ḳhat likhūñ

tū apnā ta.āruf bhej maiñ tujh par ik pyārī sī nazm likhūñ

ki sunā hai tū bhī pyārā sā ik lams hai

ik lamha hai

lekin maiñ ne tujhe kab chakhā sūñghā dekhā sunā mahsūs kiyā hai

jab se maiñ jaagā huuñ

tū to jantriyoñ meñ morcha-band hai soyā huā hai

jaag ai nādīda saa.at

ai sadiyoñ kā andoh liye lamhe ab mujh par bhī muTThī bhar sahar chhiḌak

bas ek jhalak dikhlā

terī ek jhalak

mire pāñch havās kī baḳhiya baḳhiya udhḌī jholī sī bhī degī bhar bhī degī

phir maiñ tujh par ik lā-fānī nazm likhūñgā

tujhe sunāne ā.ūñgā

kin harfon ki tafhim karun

kin rangon ki tajsim karun

kis rah chalun aur chalta jaun khula nahin

abhi darwaza to khula nahin

kis phul ki madh likhun

ai harf-e-sahar-asar ai yaum-e-azadi

main ne to nahin dekha

tere lams se kaun sa sang gulab hua aaina aab hua

is bagh mein kaun si musht-e-KHak khuli KHushbu aazad hui

be-bas aur sat bahaaren aur KHizaen

ek hi mausam ki ajrak main dekh chuka hun

lekin main ne wo din kis din dekha hai

jab aankhen rauzan chhoD ke phulon ki kyari mein bas jati hain koyal gati hai

koyal gati hai

jhule paDte hain baghon mein

husn se reza reza wasl Tapakta hai

main ne kab dekha hai

abhi darwaza to khula nahin

abhi darwaza to khula nahin

darwaza khule to main bhi qalam mein taza hawa ki siyahi bhar lun aur ek KHat likhun

main tere pate par KHat likhun

tu apna taaruf bhej main tujh par ek pyari si nazm likhun

ki suna hai tu bhi pyara sa ek lams hai

ek lamha hai

lekin main ne tujhe kab chakha sungha dekha suna mahsus kiya hai

jab se main jaga hun

tu to jantriyon mein morcha-band hai soya hua hai

jag ai nadida saat

ai sadiyon ka andoh liye lamhe ab mujh par bhi muTThi bhar sahar chhiDak

bas ek jhalak dikhla

teri ek jhalak

mere panch hawas ki baKHiya baKHiya udhDi jholi si bhi degi bhar bhi degi

phir main tujh par ek la-fani nazm likhunga

tujhe sunane aaunga