ek tazad

koh se zarrīñ aziyyat ke guzar jaane ke ba.ad

surḳh naġhma shaam kā ik pal meñ mar jaane ke ba.ad

haañ pas-az-fariyād-o-qalb-e-dahr kī larzish ke ba.ad

din kī tum ālūd-zard-o-lāla-gūñ kāvish ke ba.ad

tīrgī ke dāġh-e-dil se kis tarah dho.uñgā maiñ

jāgte hī jāgte phir sub.h tak ro.uñgā maiñ

haañ vahī maiñ din ko jis kī aañkh thī aur āftāb

haañ vahī maiñ jis ne dekhā dahr labrez-e-hayāt

zehan-e-insānī mirā kahtā hai khā kar pech-o-tāb

dekh le husn-e-manāzir ko nahīñ hāsil sabāt

qalb maiḳhāne kī hā-o-hū kā aadī hai mirā

kuchh ta.alluq hī nahīñ mujh ko sukūn-e-sañg se

mujh ko ḳhush aatī nahīñ hai amn kī shab-gūñ fazā

ruuh ko taskīñ milegī ek paiham jañg se

koh se zarrin aziyyat ke guzar jaane ke baad

surKH naghma sham ka ek pal mein mar jaane ke baad

han pas-az-fariyaad-o-qalb-e-dahr ki larzish ke baad

din ki tum aalud-zard-o-lala-gun kawish ke baad

tirgi ke dagh-e-dil se kis tarah dhounga main

jagte hi jagte phir subh tak rounga main

han wahi main din ko jis ki aankh thi aur aaftab

han wahi main jis ne dekha dahr labrez-e-hayat

zehan-e-insani mera kahta hai kha kar pech-o-tab

dekh le husn-e-manazir ko nahin hasil sabaat

qalb maiKHane ki ha-o-hu ka aadi hai mera

kuchh talluq hi nahin mujh ko sukun-e-sang se

mujh ko KHush aati nahin hai amn ki shab-gun faza

ruh ko taskin milegi ek paiham jang se