ek thi aurat

ye jī chāhtā hai ki tum ek nannhī sī laḌkī ho aur ham tumheñ god meñ le ke apnī biThā leñ

yūñhī cīḳho chillāo hañs do yūñhī haath uThāo havā meñ hilāo hilā kar girā do

kabhī aise jaise koī baat kahne lagī ho

kabhī aise jaise na boleñge tum se

kabhī muskurāte hue shor karte hue phir gale se lipaT kar karo aisī bāteñ

hameñ sarsarātī havā yaad aa.e

jo gunjān peḌoñ kī shāḳhoñ se Takrā.e dil ko anokhī pahelī bujhā.e magar vo pahelī samajh meñ na aa.e

koī sard chashma ubaltā huā aur machaltā huā yaad aa.e

jo ho dekhne meñ Tapaktī huī chand būñdeñ

magar apnī had se baḌhe to bane ek naddī bane ek dariyā bane ek sāgar

ye jī chāhtā hai ki ham aise sāgar kī lahroñ pe aisī havā se bahā.eñ vo kashtī jo bahtī nahīñ hai

musāfir ko lekin bahātī chalī jaatī hai aur palaT kar nahīñ aatī hai ek gahre sakūñ se milātī chalī jaatī hai

ye jī chāhtā hai ki ham bhī yūñhī chīḳheñ chillā.eñ hañs deñ yūñhī haath uThā.eñ

havā meñ hilā.eñ hilā kar girā deñ

kabhī aise jaise koī baat kahne lage haiñ

magar tum hameñ god meñ le ke apnī biThā lo

machalne lageñ to sambhālo

kabhī muskurāte hue shor karte hue phir gale se lipaT kar kareñ aisī bāteñ

tumheñ sarsarātī havā yaad aa.e

vahī sarsarātī havā jis ke mīThe fusūñ se dupaTTa phisal jaatā hai

vahī sarsarātī havā jo har anjān aurat ke bikhre hue gesuoñ ko

kisī so.e jañgal pe ganghor kaalī ghaTā kā nayā bhes de kar

jagā detī hai

tumheñ sarsarātī havā yaad aa.e

hameñ sarsarātī havā yaad aa.e

ye jī chāhtā hai

magar apnī had se baḌhe to har ik shai bane ek naddī bane ek dariyā bane ek sāgar

vo sāgar jo bahte musāfir ko aage bahātā nahīñ hai jhakole diye jaatā hai bas

jhakole diye jaatā hai

aur phir jī hī jī meñ musāfir ye kahtā hai apnī kahānī na.ī to nahīñ hai

purānī kahānī meñ kyā lutf aa.e

hameñ aaj kis ne kahā thā purānī kahānī sunāo

ye ji chahta hai ki tum ek nannhi si laDki ho aur hum tumhein god mein le ke apni biTha len

yunhi ciKHo chillao hans do yunhi hath uThao hawa mein hilao hila kar gira do

kabhi aise jaise koi baat kahne lagi ho

kabhi aise jaise na bolenge tum se

kabhi muskuraate hue shor karte hue phir gale se lipaT kar karo aisi baaten

hamein sarsaraati hawa yaad aae

jo gunjaan peDon ki shaKHon se Takrae dil ko anokhi paheli bujhae magar wo paheli samajh mein na aae

koi sard chashma ubalta hua aur machalta hua yaad aae

jo ho dekhne mein Tapakti hui chand bunden

magar apni had se baDhe to bane ek naddi bane ek dariya bane ek sagar

ye ji chahta hai ki hum aise sagar ki lahron pe aisi hawa se bahaen wo kashti jo bahti nahin hai

musafir ko lekin bahati chali jati hai aur palaT kar nahin aati hai ek gahre sakun se milati chali jati hai

ye ji chahta hai ki hum bhi yunhi chiKHen chillaen hans den yunhi hath uThaen

hawa mein hilaen hila kar gira den

kabhi aise jaise koi baat kahne lage hain

magar tum hamein god mein le ke apni biTha lo

machalne lagen to sambhaalo

kabhi muskuraate hue shor karte hue phir gale se lipaT kar karen aisi baaten

tumhein sarsaraati hawa yaad aae

wahi sarsaraati hawa jis ke miThe fusun se dupaTTa phisal jata hai

wahi sarsaraati hawa jo har anjaan aurat ke bikhre hue gesuon ko

kisi soe jangal pe ganghor kali ghaTa ka naya bhes de kar

jaga deti hai

tumhein sarsaraati hawa yaad aae

hamein sarsaraati hawa yaad aae

ye ji chahta hai

magar apni had se baDhe to har ek shai bane ek naddi bane ek dariya bane ek sagar

wo sagar jo bahte musafir ko aage bahata nahin hai jhakole diye jata hai bas

jhakole diye jata hai

aur phir ji hi ji mein musafir ye kahta hai apni kahani nai to nahin hai

purani kahani mein kya lutf aae

hamein aaj kis ne kaha tha purani kahani sunao