ek zan-e-KHana-ba-dosh

tum ne dekhī hai kabhī ek zan-e-ḳhāna-ba-dosh

jis ke ḳheme se pare raat kī tārīkī meñ

gursana bheḌiye ġhurrāte haiñ

duur se aatī hai jab us kī lahū kī ḳhushbū

sansanātī haiñ darindoñ kī hañsī

aur dāñtoñ meñ kasak hotī hai

ki kareñ us kā badan sad-pāra

apne ḳheme meñ simaT kar aurat

raat āñkhoñ meñ bitā detī hai

kabhī kartī hai alaao raushan

bheḌiye duur bhagāne ke liye

kabhī kartī hai ḳhayāl

tez nukīlā jo auzār kahīñ mil jaa.e

to banā le hathiyār

us ke ḳheme meñ bhalā kyā hogā

TuuTe phūTe hue bartan do-chār

dil ke bahlāne ko shāyad ye ḳhayāl aate haiñ

us ko mālūm hai shāyad na sahar ho paa.e

sote bachchoñ pe jamā.e nazreñ

kaan aahaT pe dhare baiThī hai

haañ dhyān us kā jo baT jaa.e kabhī

gungunātī hai koī bisrā giit

kisī banjāre kā

tum ne dekhi hai kabhi ek zan-e-KHana-ba-dosh

jis ke KHeme se pare raat ki tariki mein

gursana bheDiye ghurraate hain

dur se aati hai jab us ki lahu ki KHushbu

sansanati hain darindon ki hansi

aur danton mein kasak hoti hai

ki karen us ka badan sad-para

apne KHeme mein simaT kar aurat

raat aankhon mein bita deti hai

kabhi karti hai alao raushan

bheDiye dur bhagane ke liye

kabhi karti hai KHayal

tez nukila jo auzar kahin mil jae

to bana le hathiyar

us ke KHeme mein bhala kya hoga

TuTe phuTe hue bartan do-chaar

dil ke bahlane ko shayad ye KHayal aate hain

us ko malum hai shayad na sahar ho pae

sote bachchon pe jamae nazren

kan aahaT pe dhare baiThi hai

han dhyan us ka jo baT jae kabhi

gungunati hai koi bisra git

kisi banjare ka