ekta

jo ektā kī lagan ho dil meñ to be-qarārī na paas aa.e

kisī kā jaadū kisī kā Tonā hamāre uupar nahīñ chalegā

agar ham apne ko ḳhud samajh leñ agar ham apne ko aap parkheñ

na koī aafat kahīñ uThegī na dil dukhegā na ghar jalegā

har ek bachcha hai ek bachcha na hai kisī kā kabhī adū vo

ye bhed bhaav ye fāsla sab ḳhud apnā paidā kiyā huā hai

kisī kā maz.hab nahīñ ye kahtā ki tum na jiine do dūsroñ ko

ḳhudā to sab kā hai ek lekin maqām-e-sajda judā judā hai

sunā hai kal tak the vo paḌosī baḌā thā aapas meñ bhā.ī-chāra

vahī paḌosī to ab bhī haiñ vo magar hai aapas meñ jañg kaisī

miTā do gar dil se bhed-bhāv to fāsla phir koī na hogā

tumheñ ye ehsās ḳhud hī hogā ki hai diloñ meñ tarañg kaisī

jo ekta ki lagan ho dil mein to be-qarari na pas aae

kisi ka jadu kisi ka Tona hamare upar nahin chalega

agar hum apne ko KHud samajh len agar hum apne ko aap parkhen

na koi aafat kahin uThegi na dil dukhega na ghar jalega

har ek bachcha hai ek bachcha na hai kisi ka kabhi adu wo

ye bhed bhaw ye fasla sab KHud apna paida kiya hua hai

kisi ka mazhab nahin ye kahta ki tum na jine do dusron ko

KHuda to sab ka hai ek lekin maqam-e-sajda juda juda hai

suna hai kal tak the wo paDosi baDa tha aapas mein bhai-chaara

wahi paDosi to ab bhi hain wo magar hai aapas mein jang kaisi

miTa do gar dil se bhed-bhaw to fasla phir koi na hoga

tumhein ye ehsas KHud hi hoga ki hai dilon mein tarang kaisi