KHwab-jangal

nīñd-pālkī utrī raat duur jañgal meñ

ḳhvāb ḳhvāb manzar thā dhīre dhīre bahtī thī

simfanī havāoñ kī raat chāñd bādal meñ

chāñdnī kī bāñhoñ meñ jhiil vāltz kartī thī

dhīmī dhīmī sī ḳhushbū saath saath chaltī thī

kunj meñ daraḳhtoñ ke be-ḳhudī ke aalam meñ mast Daar hirnoñ kī

bele raqs kartī thī

hirniyoñ kī āñkhoñ meñ mushk sī mahaktī thī

kaale pairahan pahne bā-vaqār peḌoñ ne vailen sambhāle the

jhūmte hue patte tāliyāñ bajāte the

gungunātī bailoñ par phuul kasmasāte the

jugnuoñ kī jhilmil se rāj-hañs sote se jaag jaag uThte the

āhaTeñ parindoñ kī apne shab-baseroñ meñ pā.eleñ bajātī thiiñ

apne band kamre meñ aañkh jo khulī dekhā

shahr kī kasāfat se muzmahil sā sūraj phir

ek aur na.e din kī dhuul le ke aayā thā

T v vaale kamre meñ sub.h kā ḳhabar-nāma ittilā.a detā thā

ek aur jañgal ko kaaT kar nikāleñge rāsta taraqqī kā

nind-palki utri raat dur jangal mein

KHwab KHwab manzar tha dhire dhire bahti thi

simfani hawaon ki raat chand baadal mein

chandni ki banhon mein jhil waltz karti thi

dhimi dhimi si KHushbu sath sath chalti thi

kunj mein daraKHton ke be-KHudi ke aalam mein mast Dar hirnon ki

bele raqs karti thi

hirniyon ki aankhon mein mushk si mahakti thi

kale pairahan pahne ba-waqar peDon ne wailen sambhaale the

jhumte hue patte taliyan bajate the

gungunati bailon par phul kasmasate the

jugnuon ki jhilmil se raj-hans sote se jag jag uThte the

aahaTen parindon ki apne shab-baseron mein paelen bajati thin

apne band kamre mein aankh jo khuli dekha

shahr ki kasafat se muzmahil sa suraj phir

ek aur nae din ki dhul le ke aaya tha

T w wale kamre mein subh ka KHabar-nama ittilaa deta tha

ek aur jangal ko kaT kar nikalenge rasta taraqqi ka