fasla

havā.eñ le ga.iiñ vo ḳhaak bhī uḌā ke jise

kabhī tumhāre qadam chhū ga.e the aur maiñ ne

ye jī se chāhā thā dāman meñ bāñdh lūñgā use

sunā thā maiñ ne kabhī yuuñ huā hai duniyā meñ

ki aag lene ga.e aur payambarī paa.ī

kabhī zamīñ ne samundar ugal diye lekin

bhañvar hī le ga.e kashtī bachā ke tūfāñ se

meñ sochtā huuñ payambar nahīñ agar na sahī

ki itnā bojh uThāne kī mujh meñ taab na thī

magar ye kyuuñ na huā ġham milā thā duurī kā

to hausla bhī milā hotā sañg o aahan sā

magar ḳhudā ko ye sab sochne kā vaqt kahāñ?

hawaen le gain wo KHak bhi uDa ke jise

kabhi tumhaare qadam chhu gae the aur main ne

ye ji se chaha tha daman mein bandh lunga use

suna tha main ne kabhi yun hua hai duniya mein

ki aag lene gae aur payambari pai

kabhi zamin ne samundar ugal diye lekin

bhanwar hi le gae kashti bacha ke tufan se

mein sochta hun payambar nahin agar na sahi

ki itna bojh uThane ki mujh mein tab na thi

magar ye kyun na hua gham mila tha duri ka

to hausla bhi mila hota sang o aahan sa

magar KHuda ko ye sab sochne ka waqt kahan?