fasle ki aag

har taraf hai sannāTā

har taraf hai vīrāna

āsmāñ ke parde meñ

māhtāb pinhāñ hai

zulmatoñ ke saa.e meñ

kā.enāt vīrāñ hai

lāpata havā bhī hai

lāpata parinde bhī

be-sadā udāsī meñ

barg-o-shāḳh bhī chup chup

har shajar ḳhamoshī meñ

dard se hai pazhmurda

ḳhvāb-gāh meñ merī

ḳhāmushī balā kī hai

huuñ to maiñ thakā-māñda

phir bhī niiñd anqā hai

maiñ niDhāl bistar par

ik ḳhalish liye andar

mahv huuñ ḳhayāloñ meñ

chāhatoñ meñ tum merī

bas ga.ī thiiñ ḳhushbū sī

hijr kā libās apnā

har ghaḌī mahaktā thā

mere gulshan-e-jāñ kī

ik kalī thiiñ tum goyā

yaad hai mujhe ab tak

vo tumhārī ḳhalvat kā

avvalīn manzar bhī

shauq-e-dīd laayā thā

khīñch kar mujhe tum tak

tishna tishna nazroñ se

tum ko maiñ ne dekhā thā

tum ko maiñ ne chāhā thā

be-qarār ho kar bhī

tum ko maiñ ne sochā thā

tishnagī ke sahrā meñ

pā liyā jo tum ko to

shauq ke sahāboñ meñ

pyaas bhī bujhā.ī thī

sarḳhushī kī mastī meñ

kā.enāt raqsāñ thī

jism-o-jāñ kī ḳhushbū se

bāġh-e-dil bhī mahkā thā

ġham tumhārā merā thā

merā ġham tumhārā thā

qurbatoñ ke saa.e meñ

mushtarak thiiñ socheñ bhī

ranj-o-shādmānī meñ

the sharīk donoñ hī

zindagī kī rāhoñ meñ

ham-safar thiiñ tum merī

aate jaate mausam kā

silsila rahā jaarī

māh-o-sāl bhī kitne

saath saath guzre the

yak-ba-yak havāoñ se

rang-e-āsmāñ badlā

phir rutoñ ke chehre par

rang-e-zard bhī aaya

vaqt hī ke hāthoñ meñ

ho ga.e khilaunā ham

aas kī kiran le kar

apnī apnī āñkhoñ meñ

dard ke safar par ham

nikle jānib-e-manzil

aur bhī ka.ī āñkheñ

darmiyāñ hamāre thiiñ

jin meñ jhilmilātī sī

ik kiran thī fardā kī

duur des meñ ham ne

shahr-e-ḳhvāb jab dekhā

jiine kī lalak apnī

ho ga.ī thī do-bālā

kaif-e-ārzū ban kar

zindagī bhī raqsāñ thī

aatī jaatī lahroñ meñ

bah ga.e achānak ham

ho ga.ī shikasta sī

kashti-e-tamannā bhī

pahlī baar bichhḌe the

ek dūsre se ham

tum udhar shikasta-pā

maiñ idhar shikasta dil

biich meñ samundar hai

fāsla tavālat kā

darmiyāñ hamāre hai

vaqt hī ke hāthoñ meñ

jaise ham khilaunā hoñ

dard kā tamāshā ab

roz dekhtā huuñ maiñ

tum bhī is tamāshe ko

roz dekhtī hogī

ab ye sochtā huuñ maiñ

ham ḳhizāñ-rasīdoñ ko

kab talak jalā.egī

fāsle kī aag āḳhir

har taraf hai sannaTa

har taraf hai virana

aasman ke parde mein

mahtab pinhan hai

zulmaton ke sae mein

kaenat viran hai

lapata hawa bhi hai

lapata parinde bhi

be-sada udasi mein

barg-o-shaKH bhi chup chup

har shajar KHamoshi mein

dard se hai pazhmurda

KHwab-gah mein meri

KHamushi bala ki hai

hun to main thaka-manda

phir bhi nind anqa hai

main niDhaal bistar par

ek KHalish liye andar

mahw hun KHayalon mein

chahaton mein tum meri

bas gai thin KHushbu si

hijr ka libas apna

har ghaDi mahakta tha

mere gulshan-e-jaan ki

ek kali thin tum goya

yaad hai mujhe ab tak

wo tumhaari KHalwat ka

awwalin manzar bhi

shauq-e-did laya tha

khinch kar mujhe tum tak

tishna tishna nazron se

tum ko main ne dekha tha

tum ko main ne chaha tha

be-qarar ho kar bhi

tum ko main ne socha tha

tishnagi ke sahra mein

pa liya jo tum ko to

shauq ke sahabon mein

pyas bhi bujhai thi

sarKHushi ki masti mein

kaenat raqsan thi

jism-o-jaan ki KHushbu se

bagh-e-dil bhi mahka tha

gham tumhaara mera tha

mera gham tumhaara tha

qurbaton ke sae mein

mushtarak thin sochen bhi

ranj-o-shadmani mein

the sharik donon hi

zindagi ki rahon mein

ham-safar thin tum meri

aate jate mausam ka

silsila raha jari

mah-o-sal bhi kitne

sath sath guzre the

yak-ba-yak hawaon se

rang-e-asman badla

phir ruton ke chehre par

rang-e-zard bhi aaya

waqt hi ke hathon mein

ho gae khilauna hum

aas ki kiran le kar

apni apni aankhon mein

dard ke safar par hum

nikle jaanib-e-manzil

aur bhi kai aankhen

darmiyan hamare thin

jin mein jhilmilati si

ek kiran thi farda ki

dur des mein hum ne

shahr-e-KHwab jab dekha

jine ki lalak apni

ho gai thi do-baala

kaif-e-arzu ban kar

zindagi bhi raqsan thi

aati jati lahron mein

bah gae achanak hum

ho gai shikasta si

kashti-e-tamanna bhi

pahli bar bichhDe the

ek dusre se hum

tum udhar shikasta-pa

main idhar shikasta dil

bich mein samundar hai

fasla tawalat ka

darmiyan hamare hai

waqt hi ke hathon mein

jaise hum khilauna hon

dard ka tamasha ab

roz dekhta hun main

tum bhi is tamashe ko

roz dekhti hogi

ab ye sochta hun main

hum KHizan-rasidon ko

kab talak jalaegi

fasle ki aag aaKHir