fabe-ayye aalaye rabbikuma tukazziban

dil-āzārī bhī ik fan hai

aur kuchh log to

saarī zindagī isī kī roTī khāte haiñ

chāhe un kā burj koī ho

aqrab hī lagte haiñ

tīsre darje ke piile aḳhbāroñ par ye

apnī yarqānī sochoñ se

aur bhī zardī malte rahte haiñ

maalā baarī cabin hoñ yā pāñch sitāra hotel

kahīñ bhī qai karne se baaz nahīñ aate

uupar se is amal ko

fiqre-bāzī kahte haiñ

jis kā pahlā nishāna umūman

bill ko adā karne vaalā sāthī hotā hai!

apne apne kuñveñ ko bahr-e-āzam kahne aur samajhne vaale

ye nanhe meñDak

har hāthī ko dekh ke phūlne lage haiñ

aur jab phaTne vaale hoñ to

hāthī kī āñkhoñ par phabtī kasne lage haiñ

kavve bhī anDe khāne ke shauq ko apne

fāḳhta ke ghar jā kar puurā karte haiñ

lekin ye vo saañp haiñ jo ki

apne bachche

ḳhud hī chaT kar jaate haiñ

kabhī kabhī maiñ sochtī huuñ ki

sāñpoñ kī ye ḳhaslat

mālik-e-jiñn-o-ins kii, insānoñ ke haq meñ

kaisī be-pāyāñ rahmat hai!

dil-azari bhi ek fan hai

aur kuchh log to

sari zindagi isi ki roTi khate hain

chahe un ka burj koi ho

aqrab hi lagte hain

tisre darje ke pile aKHbaron par ye

apni yarqani sochon se

aur bhi zardi malte rahte hain

mala bari cabin hon ya panch sitara hotel

kahin bhi qai karne se baz nahin aate

upar se is amal ko

fiqre-bazi kahte hain

jis ka pahla nishana umuman

bill ko ada karne wala sathi hota hai!

apne apne kunwen ko bahr-e-azam kahne aur samajhne wale

ye nanhe meinDak

har hathi ko dekh ke phulne lage hain

aur jab phaTne wale hon to

hathi ki aankhon par phabti kasne lage hain

kawwe bhi anDe khane ke shauq ko apne

faKHta ke ghar ja kar pura karte hain

lekin ye wo sanp hain jo ki

apne bachche

KHud hi chaT kar jate hain

kabhi kabhi main sochti hun ki

sanpon ki ye KHaslat

malik-e-jinn-o-ins ki, insanon ke haq mein

kaisi be-payan rahmat hai!