faisla

aaj sochā hai ki ehsās ko zaa.il kar duuñ

apne shorīda irāde ko apāhij kar luuñ

apnī majrūh tamannā kā mudāvā na karūñ

apnī ḳhvābīda mohabbat kā alamnāk ma.aal

apnī be-ḳhvāb javānī ko sunāyā na karūñ

apne be-kaif tasavvur ke sahāre ke liye

ek bhī sham.a sar-e-rāh jalāyā na karūñ

apne be-sūd taḳhayyul ko bhaTak jaane duuñ

zindagī jaise guzartī hai guzar jaane duuñ

chand lamhoñ meñ guzarne ko hai hañgāma-e-shab

so ga.e jaam surāhī kā sahārā le kar

sard paḌne lagā ujḌī huī mahfil kā gudāz

thak ga.ī gardish-e-yak-rañg se saaqī kī nazar

chand bedār fasānoñ kā asar luuT gayā

dab gayā talḳh haqīqat meñ nasha tā-ba-kamar

maiñ abhī āḳhirī mai-nosh huuñ maiḳhāne meñ

dekhnā kyā hai mirī samt baḌhā jaam baḌhā

lā surāhī ko mire paas shikasta hī sahī

chheḌ TuuTe hue tāroñ ko karāheñ to zarā

sochtā kyā hai uñDel aur uñDel aur uñDel

sard paḌtī huī mahfil ke mukaddar pe na jā

apne bedār tafakkur kī halākat pe hañsūñ

aaj sochā hai ki ehsās ko zaa.il kar duuñ

aaj socha hai ki ehsas ko zail kar dun

apne shorida irade ko apahij kar lun

apni majruh tamanna ka mudawa na karun

apni KHwabida mohabbat ka alamnak maal

apni be-KHwab jawani ko sunaya na karun

apne be-kaif tasawwur ke sahaare ke liye

ek bhi shama sar-e-rah jalaya na karun

apne be-sud taKHayyul ko bhaTak jaane dun

zindagi jaise guzarti hai guzar jaane dun

chand lamhon mein guzarne ko hai hangama-e-shab

so gae jam surahi ka sahaara le kar

sard paDne laga ujDi hui mahfil ka gudaz

thak gai gardish-e-yak-rang se saqi ki nazar

chand bedar fasanon ka asar luT gaya

dab gaya talKH haqiqat mein nasha ta-ba-kamar

main abhi aaKHiri mai-nosh hun maiKHane mein

dekhna kya hai meri samt baDha jam baDha

la surahi ko mere pas shikasta hi sahi

chheD TuTe hue taron ko karahen to zara

sochta kya hai unDel aur unDel aur unDel

sard paDti hui mahfil ke mukaddar pe na ja

apne bedar tafakkur ki halakat pe hansun

aaj socha hai ki ehsas ko zail kar dun