faisla

maiñ tirī yaad meñ duniyā ko bhulā baiThā huuñ

dīda-o-dil tirī rāhoñ meñ bichhā baiThā huuñ

tū jo aa jaa.e to mil jaa.e mire dil ko sukūñ

aah maiñ sabr-o-sukūñ apnā luTā baiThā huuñ

tū samajhtī hai ki ma.ayūb hai aanā terā

merā da.avā hai ki aanā hī paḌegā tujh ko

sham.a bhī jaltī hai parvānoñ kī ḳhātir āḳhir

azm-e-īsār dikhānā hī paḌegā tujh ko

zindagānī kā tavīl aur ye dushvār safar

bin tire paañv mire itnā chaleñge kaise

ye javānī to kisī taur guzar jā.egī

ahd-e-pīrī ke shab-o-roz Dhaleñge kaise

tū ye kahtī thī ki hamrāh chaleñge ham tum

aisā lagtā hai vo da.ave tire jazbātī the

maiñ samajhtā rahā jin va.adoñ ko patthar kī lakīr

ab ye lagtā hai vo iqrār bhī lamhātī the

maiñ bhaTaktā rahā maazī ke añdheroñ meñ bahut

ab magar haal ko pur-nūr banānā hogā

aaj bahlā nahīñ sakte mujhe ḳhālī va.ade

bandisheñ tujh ko sabhī toḌ ke aanā hogā

main teri yaad mein duniya ko bhula baiTha hun

dida-o-dil teri rahon mein bichha baiTha hun

tu jo aa jae to mil jae mere dil ko sukun

aah main sabr-o-sukun apna luTa baiTha hun

tu samajhti hai ki mayub hai aana tera

mera dawa hai ki aana hi paDega tujh ko

shama bhi jalti hai parwanon ki KHatir aaKHir

azm-e-isar dikhana hi paDega tujh ko

zindagani ka tawil aur ye dushwar safar

bin tere panw mere itna chalenge kaise

ye jawani to kisi taur guzar jaegi

ahd-e-piri ke shab-o-roz Dhalenge kaise

tu ye kahti thi ki hamrah chalenge hum tum

aisa lagta hai wo dawe tere jazbaati the

main samajhta raha jin wadon ko patthar ki lakir

ab ye lagta hai wo iqrar bhi lamhati the

main bhaTakta raha mazi ke andheron mein bahut

ab magar haal ko pur-nur banana hoga

aaj bahla nahin sakte mujhe KHali wade

bandishen tujh ko sabhi toD ke aana hoga