fan para

ye kitāboñ kī saf-ba-saf jildeñ

kāġhazoñ kā fuzūl istīma.al

raushnā.ī kā shāndār isrāf

sīdhe sīdhe se kuchh siyah dhabbe

jin kī taujīh aaj tak na huī

chand ḳhush-zauq kam-nasīboñ ne

basar auqāt ke liye shāyad

ye lakīreñ bikher Daalī haiñ

kitnī hī be-qusūr nasloñ ne

in ko paḌhne ke jurm meñ tā-umr

le ke kashkūl-e-ilm-o-hikmat-o-fan

kū-ba-kū jaañ kī bhiik māñgī hai

aah ye vaqt kā azāb-e-alīm

vaqt ḳhallāq be-shu.ūr qadīm

saarī tārīfeñ un añdheroñ kī

jin meñ partav na koī parchhā.īñ

aah ye zindagī kī tanhā.ī

sochnā aur sochte rahnā

chand ma.asūm pāgaloñ kī sazā

aaj maiñ ne bhī soch rakkhā hai

vaqt se intiqām lene ko

yūñhī tā-shām saade kāġhaz par

TeḌhe TeḌhe ḳhutūt khīñche jaa.eñ

ye kitabon ki saf-ba-saf jilden

kaghazon ka fuzul istimal

raushnai ka shandar israf

sidhe sidhe se kuchh siyah dhabbe

jin ki taujih aaj tak na hui

chand KHush-zauq kam-nasibon ne

basar auqat ke liye shayad

ye lakiren bikher Dali hain

kitni hi be-qusur naslon ne

in ko paDhne ke jurm mein ta-umr

le ke kashkul-e-ilm-o-hikmat-o-fan

ku-ba-ku jaan ki bhik mangi hai

aah ye waqt ka azab-e-alim

waqt KHallaq be-shuur qadim

sari tarifen un andheron ki

jin mein partaw na koi parchhain

aah ye zindagi ki tanhai

sochna aur sochte rahna

chand masum pagalon ki saza

aaj main ne bhi soch rakkha hai

waqt se intiqam lene ko

yunhi ta-sham sade kaghaz par

TeDhe TeDhe KHutut khinche jaen