farar

apne maazī ke tasavvur se hirāsāñ huuñ maiñ

apne guzre hue ayyām se nafrat hai mujhe

apnī be-kār tamannāoñ pe sharminda huuñ

apnī be-sūd umīdoñ pe nadāmat hai mujhe

mere maazī ko andhere meñ dabā rahne do

merā maazī mirī zillat ke sivā kuchh bhī nahīñ

merī ummīdoñ kā hāsil mirī kāvish kā sila

ek be-nām aziyyat ke sivā kuchh bhī nahīñ

kitnī be-kār umīdoñ kā sahārā le kar

maiñ ne aivān sajā.e the kisī kī ḳhātir

kitnī be-rabt tamannāoñ ke mub.ham ḳhāke

apne ḳhvāboñ meñ basā.e the kisī kī ḳhātir

mujh se ab merī mohabbat ke fasāne na kaho

mujh ko kahne do ki maiñ ne unheñ chāhā hī nahīñ

aur vo mast nigāheñ jo mujhe bhuul ga.iiñ

maiñ ne un mast nigāhoñ ko sarāhā hī nahīñ

mujh ko kahne do ki maiñ aaj bhī jī saktā huuñ

ishq nākām sahī zindagī nākām nahīñ

in ko apnāne kī ḳhvāhish unheñ paane kī talab

shauq-e-bekār sahī sa.ī-e-ġham-e-anjām nahīñ

vahī gesū vahī nazreñ vahī aariz vahī jism

maiñ jo chāhūñ to mujhe aur bhī mil sakte haiñ

vo kañval jin ko kabhī un ke liye khilnā thā

un kī nazroñ se bahut duur bhī khil sakte haiñ

apne mazi ke tasawwur se hirasan hun main

apne guzre hue ayyam se nafrat hai mujhe

apni be-kar tamannaon pe sharminda hun

apni be-sud umidon pe nadamat hai mujhe

mere mazi ko andhere mein daba rahne do

mera mazi meri zillat ke siwa kuchh bhi nahin

meri ummidon ka hasil meri kawish ka sila

ek be-nam aziyyat ke siwa kuchh bhi nahin

kitni be-kar umidon ka sahaara le kar

main ne aiwan sajae the kisi ki KHatir

kitni be-rabt tamannaon ke mubham KHake

apne KHwabon mein basae the kisi ki KHatir

mujh se ab meri mohabbat ke fasane na kaho

mujh ko kahne do ki main ne unhen chaha hi nahin

aur wo mast nigahen jo mujhe bhul gain

main ne un mast nigahon ko saraha hi nahin

mujh ko kahne do ki main aaj bhi ji sakta hun

ishq nakaam sahi zindagi nakaam nahin

in ko apnane ki KHwahish unhen pane ki talab

shauq-e-bekar sahi sai-e-gham-e-anjam nahin

wahi gesu wahi nazren wahi aariz wahi jism

main jo chahun to mujhe aur bhi mil sakte hain

wo kanwal jin ko kabhi un ke liye khilna tha

un ki nazron se bahut dur bhi khil sakte hain