fareb

har ek shaam mujhe yuuñ ḳhayāl aatā hai

ki jaise TaaT kā mailā phaTā huā parda

tumhāre haath kī jumbish se kaañp jā.egā

ki jaise tum abhī daftar se lauT aaoge

mujhe to yaad nahīñ kuchh tumhāre sar kī qasam

magar paḌos kī laḌkī batā rahī thī ki maiñ

ab apnī maañg meñ afshāñ nahīñ sajātī huuñ

tave pe roTiyāñ akasr jalā.ī haiñ maiñ ne

shakar ke badle namak chaa.e meñ milātī huuñ

vo kah rahī thī ki nañgī kalā.iyāñ merī

tamām umr yūñhī chūḌiyoñ ko tarseñgī

ġhamoñ kī dhuup meñ jalte hue is āñgan par

masarratoñ kī ghaTā.eñ kabhī na barseñgī

vo kah rahī thī ki tum ab kabhī na aaoge

galī ke moḌ pe lekin har ek shaam mujhe

tumhāre qadmoñ kī aahaT sunā.ī detī hai

har ek shaam mujhe yuuñ ḳhayāl aatā hai

ki jaise tum abhī daftar se lauT aaoge

har ek sham mujhe yun KHayal aata hai

ki jaise TaT ka maila phaTa hua parda

tumhaare hath ki jumbish se kanp jaega

ki jaise tum abhi daftar se lauT aaoge

mujhe to yaad nahin kuchh tumhaare sar ki qasam

magar paDos ki laDki bata rahi thi ki main

ab apni mang mein afshan nahin sajati hun

tawe pe roTiyan akasr jalai hain main ne

shakar ke badle namak chae mein milati hun

wo kah rahi thi ki nangi kalaiyan meri

tamam umr yunhi chuDiyon ko tarsengi

ghamon ki dhup mein jalte hue is aangan par

masarraton ki ghaTaen kabhi na barsengi

wo kah rahi thi ki tum ab kabhi na aaoge

gali ke moD pe lekin har ek sham mujhe

tumhaare qadmon ki aahaT sunai deti hai

har ek sham mujhe yun KHayal aata hai

ki jaise tum abhi daftar se lauT aaoge