mazdur aurten

gulnār dekhtī hai ye mazdūr aurteñ

chehroñ pe ḳhaak dhuul ke poñchhe hue nishāñ

tū aur rañg-e-ġhāza-o-gulgūna-o-shahāb

sochā bhī kis ke ḳhuun kī bantī haiñ surḳhiyāñ

gulnār dekhtī hai ye mazdūr aurteñ

maile phaTe libās haiñ mahrūm-e-shast-o-shū

tū aur itr o ambar o mushk o abiir o uud

mazdūr ke bhī ḳhuun kī aatī hai is meñ bū

gulnār dekhtī hai ye mazdūr aurteñ

tan Dhāñkne ko Thiik se kapḌā nahīñ hai paas

tū aur harīr o atlas o kam-ḳhvāb o parniyāñ

chubhtā nahīñ badan pe tire reshmī libās

gulnār dekhtī hai ye mazdūr aurteñ

chāñdī kā koī ganjh na sone kā koī taar

tū aur haikal-e-zar o āveza-e-guhar

siine pe koī dam bhī dhaḌaktā hai terā haar

gulnār dekhtī hai ye mazdūr aurteñ

sadiyoñ se har nigāh hai fāqoñ kī rahguzar

tū aur ziyāfatoñ meñ ba-sad-nāz jalva-gar

kis ke lahū se garm hai ye mez kī bahār

gulnār dekhtī hai ye mazdūr aurteñ

tārīk maqbaroñ se makāñ in ke kam nahīñ

tū aur zeb-o-zīnat-e-alvān-e-zar-nigār

kyā tere qasr-e-nāz kī hiltī nahīñ zamīñ

gulnār dekhtī hai ye mazdūr aurteñ

mehnat hī un kā saaz hai mehnat hī un kā raag

tū aur shuġhl-e-rāmish-o-raqs-o-rabāb-o-rañg

kyā tere saaz meñ bhī dahaktī hai koī aag

gulnār dekhtī haiñ ye mazdūr aurteñ

mehnat pe apne peT se majbūr aurteñ

gulnar dekhti hai ye mazdur aurten

chehron pe KHak dhul ke ponchhe hue nishan

tu aur rang-e-ghaza-o-gulguna-o-shahab

socha bhi kis ke KHun ki banti hain surKHiyan

gulnar dekhti hai ye mazdur aurten

maile phaTe libas hain mahrum-e-shast-o-shu

tu aur itr o ambar o mushk o abir o ud

mazdur ke bhi KHun ki aati hai is mein bu

gulnar dekhti hai ye mazdur aurten

tan Dhankne ko Thik se kapDa nahin hai pas

tu aur harir o atlas o kam-KHwab o parniyan

chubhta nahin badan pe tere reshmi libas

gulnar dekhti hai ye mazdur aurten

chandi ka koi ganjh na sone ka koi tar

tu aur haikal-e-zar o aaweza-e-guhar

sine pe koi dam bhi dhaDakta hai tera haar

gulnar dekhti hai ye mazdur aurten

sadiyon se har nigah hai faqon ki rahguzar

tu aur ziyafaton mein ba-sad-naz jalwa-gar

kis ke lahu se garm hai ye mez ki bahaar

gulnar dekhti hai ye mazdur aurten

tarik maqbaron se makan in ke kam nahin

tu aur zeb-o-zinat-e-alwan-e-zar-nigar

kya tere qasr-e-naz ki hilti nahin zamin

gulnar dekhti hai ye mazdur aurten

mehnat hi un ka saz hai mehnat hi un ka rag

tu aur shughl-e-ramish-o-raqs-o-rabab-o-rang

kya tere saz mein bhi dahakti hai koi aag

gulnar dekhti hain ye mazdur aurten

mehnat pe apne peT se majbur aurten