yakum may

ye may kī pahlī, din hai banda-e-mazdūr kā

muddatoñ ke ba.ad dekhā is ne jalva huur kā

ye jo rishta-dār thā ham sab kā lekin duur kā

mill ke mālik ne ise rutba diyā mansūr kā

jab lagāyā haq kā na.ara daar par khīñchā gayā

naḳhl-e-san.at is ke ḳhuuñ kī dhaar par sīñchā gayā

aaj labour-union meñ shādmānī aa.ī hai

aaj mazdūroñ ko yaad apnī javānī aa.ī hai

mil ke mālik ko magar yaad apnī naanī aa.ī hai

yā ilāhī kyā balā-e-āsmānī aa.ī hai

sunte haiñ mazdūr se mālik kā mohra piT gayā

''ek jā harf-e-vafā likkhā thā vo bhī miT gayā''

hotā hai 'may-day' kā aur 'may-poll' kā jab intizām

nāchte haiñ baañs ke gird aa ke europī avaam

lekin ab nāchegā vo zālim ki jo hai bad-lagām

baañs ke bal par dikhā.e jaise bandar apnā kaam

vo jo pahle thā kabhī bandar madārī ban gayā

ya.anī mazdūr afsar-e-sarmāya-kārī ban gayā

ba.az aise the jo sarmā.e ke Thekedār the

kahte the mazdūr ko ḳhar aur ḳhud ḳhar-kār the

chor-bāzārī kī jaḌ the aur baḌe baT-mār the

naf.a-ḳhorī ke sivā har kaam se bezār the

ab halaq meñ un ke jo khāyā aTak kar jā.egā

ġhair-mulkoñ meñ na sarmāya bhaTak kar jā.egā

pūchho in sarmāya-dāroñ se ki kab jāgoge tum

yā yūñhī piite rahoge be-muravvat mai ke ḳhum

dekho har saal aa.egī māh-e-may kī ye yakum

sunte haiñ sīdhī nahīñ hotī kabhī kutte kī dum

tum magar rakhte ho ek insān kī nok aur palak

''be-niyāzī had se guzrī banda-parvar kab talak''

qābil-e-izzat haiñ is duniyā ke mehnat-kash avaam

mulk kī daulat haiñ ye, vājib hai in kā ehtirām

us ke ye member haiñ labour-union hai jis kā naam

in kī mehnat ke diye jā.eñge in ko puure daam

ye nahīñ hogā ḳhafā ho kar dihāḌī kaaT dī

aadhe raste laa.e aur engine se gaaḌī kaaT dī

ye may ki pahli, din hai banda-e-mazdur ka

muddaton ke baad dekha is ne jalwa hur ka

ye jo rishta-dar tha hum sab ka lekin dur ka

mill ke malik ne ise rutba diya mansur ka

jab lagaya haq ka nara dar par khincha gaya

naKHl-e-sanat is ke KHun ki dhaar par sincha gaya

aaj labour-union mein shadmani aai hai

aaj mazduron ko yaad apni jawani aai hai

mil ke malik ko magar yaad apni nani aai hai

ya ilahi kya bala-e-asmani aai hai

sunte hain mazdur se malik ka mohra piT gaya

ek ja harf-e-wafa likkha tha wo bhi miT gaya

hota hai 'may-day' ka aur 'may-poll' ka jab intizam

nachte hain bans ke gird aa ke europi awam

lekin ab nachega wo zalim ki jo hai bad-lagam

bans ke bal par dikhae jaise bandar apna kaam

wo jo pahle tha kabhi bandar madari ban gaya

yani mazdur afsar-e-sarmaya-kari ban gaya

baz aise the jo sarmae ke Thekedar the

kahte the mazdur ko KHar aur KHud KHar-kar the

chor-bazari ki jaD the aur baDe baT-mar the

nafa-KHori ke siwa har kaam se bezar the

ab halaq mein un ke jo khaya aTak kar jaega

ghair-mulkon mein na sarmaya bhaTak kar jaega

puchho in sarmaya-daron se ki kab jagoge tum

ya yunhi pite rahoge be-murawwat mai ke KHum

dekho har sal aaegi mah-e-may ki ye yakum

sunte hain sidhi nahin hoti kabhi kutte ki dum

tum magar rakhte ho ek insan ki nok aur palak

be-niyazi had se guzri banda-parwar kab talak

qabil-e-izzat hain is duniya ke mehnat-kash awam

mulk ki daulat hain ye, wajib hai in ka ehtiram

us ke ye member hain labour-union hai jis ka nam

in ki mehnat ke diye jaenge in ko pure dam

ye nahin hoga KHafa ho kar dihaDi kaT di

aadhe raste lae aur engine se gaDi kaT di