farogh farruKH-zad ke liye ek nazm

musāhib-e-shāh se kaho ki

faqīh-e-āzam bhī aaj tasdīq kar ga.e haiñ

ki fasl phir se gunāhgāroñ kī pak ga.ī hai

huzūr kī jumbish-e-nazar ke

tamām jallād muntazir haiñ

ki kaun sī had janāb jaarī kareñ

to tāmīl-e-bandagī ho

kahāñ pe sar aur kahāñ pe dastār utārnā ahsan-ul-amal hai

kahāñ pe hāthoñ kahāñ zabānoñ ko qat.a kījiye

kahāñ pe darvāza rizq kā band karnā hogā

kahāñ pe āsā.ishoñ kī bhūkoñ ko maar diije

kahāñ baTegī luaan kī chhūT

aur kahāñ par

rajm ke ahkām jaarī hoñge

kahāñ pe nau saala bachchiyāñ chahal saala mardoñ ke saath

sañgīn meñ pirone kā hukm hogā

kahāñ pe iqbālī mulzimoñ ko

kisī tarah shak kā fā.eda ho

kahāñ pe māsūm daar par khīñchnā paḌegā

huzūr ahkām jo bhī jaarī kareñge

faqat iltijā ye hogī

ki apne irshād-e-āliya ko

zabānī rakheñ

vagarna

qānūnī uljhaneñ haiñ!

musahib-e-shah se kaho ki

faqih-e-azam bhi aaj tasdiq kar gae hain

ki fasl phir se gunahgaron ki pak gai hai

huzur ki jumbish-e-nazar ke

tamam jallad muntazir hain

ki kaun si had janab jari karen

to tamil-e-bandagi ho

kahan pe sar aur kahan pe dastar utarna ahsan-ul-amal hai

kahan pe hathon kahan zabanon ko qata kijiye

kahan pe darwaza rizq ka band karna hoga

kahan pe aasaishon ki bhukon ko mar dije

kahan baTegi luan ki chhuT

aur kahan par

rajm ke ahkaam jari honge

kahan pe nau sala bachchiyan chahal sala mardon ke sath

sangin mein pirone ka hukm hoga

kahan pe iqbaali mulzimon ko

kisi tarah shak ka faeda ho

kahan pe masum dar par khinchna paDega

huzur ahkaam jo bhi jari karenge

faqat iltija ye hogi

ki apne irshad-e-aliya ko

zabani rakhen

wagarna

qanuni uljhanen hain!